Uyghur rayoni kattiwashliri pakistan wekillirige “Xitayning din we millet idiyesi” ni sherhligen

Xitayche “Tengritagh tori” we “Shinjang géziti” torining xewerlirige qarighanda, 7-ayning 18-küni Uyghur aptonom rayonluq partkom sékrétari ma shingrüy, hökümet re'isi erkin tunyaz qatarliqlar ürümchide pakistan ölimaliri wekiller ömikini kütüwalghan.

Ma shingrüy bu ömektikilerni kütüwélish yighinida qilghan sözide, xitay kompartiyesi bash sékrétari shi jipingning xitayche alahidilikke ige din we milletler siyasitini bir qur tonushturup ötken, shuningdek “Bu siyasetning himayiside shinjang xelqi erkin, bextlik yashawatidu” dégen؛ arqidin amérika bashchiliqidiki bir qisim gherb döletlirining kishilik hoquq mesilisini bahane qilip, “Shinjangning muqimliqigha buzghunchiliq élip kéliwatqanliqi” ni eyibligen.

Wekiller ömiki bashliqi, pakistan islamiy mepkure (idé'ologiye) komitéti re'isi ayaz qatarliq ölimalar pakistanning xitaygha dost we qérindash ikenlikini, xitay bilen her zaman bir septe turidighanliqini bildürgen. Ular yene bu qétimliq ziyaret arqiliq “Shinjangning tereqqiyatini, musulmanlarning erkin, parawan yashawatqanliqini, pakistan-xitay iqtisad karidori arqiliq shinjang bilen téximu qoyuq alaqe ornitishni ümid qilidighanliqini” qeyt qilishqan.

Pakistan Uyghurlar duch kéliwatqan qirghinchiliqqa süküt qilipla qalmay, xitay hökümitini himaye qiliwatqan eng aktip döletlerdin biri hésablinidu. Bu heqte 2021-yili en'giliyediki “Ochuq munber” tor muhakime yighinida söz qilghan doktor mariya bastos xanim xitay bilen pakistanning hemkarliq munasiwitining iqtisadiy menpe'et we jughrapiyelik yéqinliq üstige qurulghanliqini bildürgenidi. Shu chaghda “Uyghurlar duch kéliwatqan weziyettin xewirim yoq iken” dégen pakistanning sabiq bash ministiri imranxandin tartip hazirqi rehberliri, emeldarliri we ölima-mashayixliri xitayni yaxshi körüp qollap kelgen bolup, bu qétim Uyghur rayonini ziyaret qilghan bu ömekning xitayning siyasetlirini maxtap, xitayni himaye qilidighanliqini bildürüshimu ejeblinerlik emes iken.