Пакистан 2014-йилғичә аз дегәндә 60 уйғурни хитайға қайтуруп бәргән

Мухбиримиз әркин
2022-01-24
Share

Канададики “хәлқара кишилик һоқуқ вә бихәтәрлик мунбири” намлиқ ақиллар мәркизиниң йеқинда елан қилған доклатида, пакистанниң уйғурларни бастурушта хитайға ярдәм қиливатқанлиқи, пакистан дөләт хәвпсизлики күчлириниң 2014-йилғичә тәхминән 60 нәпәр уйғурни хитайға өткүзүп бәргәнликини билдүргән.

Мәзкур ақиллар мәркизиниң 21-январ елан қилған бу һәқтики доклатида көрситишичә, пакистанниң 2010-йили терорлиқ билән һечқандақ алақиси болмисиму, бирақ униң балуҗистан ‍өлкисидин хитайға қайтуруп бәргән 5 нәпәр бигунаһ уйғур, шуларниң типик мисаллириниң бири икән.

Доклатта пакистанниң уйғурларни бастурушта хитай билән болған һәмкарлиқи 1990-йиллириниң башлиридин башланғанлиқи, пакистан хитайға қайтуруп бәргән 14 нәпәр уйғур талипни хитай аманлиқ күчлириниң чегридила етип ташлиғанлиқи тәкитләнгән. Доклатта ейтилишичә, 2009-йили йүз бәргән “5-июл үрүмчи вәқәси” дин кейин, нурғун уйғурлар пакистан арқилиқ түркийәгә қачқан болуп, пакистан даирилири бу уйғурларни тутуп хитайға қайтуруп бәргән икән.

Доклатта йәнә 2017-йилдин башлап пакистан пуқралири билән той қилған уйғур аяллириниңму хитайниң нишаниға айланғанлиқи, уларниң тутқун қилинип аилириниң парчиланғанлиқи, искәндәр һаят, ғулам дурани қатарлиқ пакистанлиқларниң аяллиридин айрилғанлиқи, ғулам дураниниң аялиниң 2017-йилдин бери лагерда икәнлики, искәндәр һаятниң анисини ‍издәп уйғур елиға кәткән ‍оғлиниң 2 йилдин бери из-дерикини алалмиғанлиқи тәкитләнгән. Доклатта ейтилишичә, пакистан башқа дөләтләрни, болупму ғәрб әллирини “мусулманларни кәмситиш яки тәқип қилиш” билән тәнқидләштә һеч иккиләнмисиму, бирақ уйғурларни дәпсәндә қилишта ‍өзини “бу мәсулийәттин халий” қилип көрсәтмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт