Пакистандики хитай пуқралири қораллиқ һуҗумға учриған, бир нәпири өлгән

28-Сентәбир чаршәнбә күни пакистанда чиш дохтурлуқи қилидиған хитай пуқралири қораллиқ һуҗумға учриған, бир нәпири өлгән.

Ройтерс агентлиқиниң хәвәр қилишичә, пакистанлиқ бир қораллиқ киши карачида хитайлар ачқан “ху чиш кесәлликлири амбулаторийәси” гә бимар қияпитидә кирип, өзлиригә ричард ху вә маргарет ху дәп исим қоювалған амболаторийәниң әр-аял хоҗайини, шундақла мәзкур амболаторийәниң хизмәтчиси реймонд човға оқ чиқирип һуҗум қилған. Вәқәдә әр-аял ху фамилилик иккәйлән яриланған, роналд раймонд чов өлгән.

Пакистан даирилири һуҗум қилғучиниң пакистанниң балучистан районидин кәлгәнликини, 30 яшлардики бу һуҗумчиниң пиланлиқ, нишанлиқ һәрикәт қилғанлиқини билдүргән.

Шу күни пакистан ичкий ишлар министири рана санаулла мәзкур һуҗум вәқәсини әйиблигән вә пакистандики хитай пуқралириниң бихәтәрликигә капаләтлик қилишни тәкитлигән.

Хәвәрдә ейтилишичә, хитай нөвәттә 54 милярд доллар мәбләғ селинған “хитай-пакистан иқтисадий каридори” түри бойичә пакистандики енергийә улиниши вә ул әслиһәлирини йеңилаватқан болуп, бу түрниң бихәтәрлики һазир һәр икки дөләтни әндишиләндүрмәктикән. Балуҗистанниң мустәқиллиқини тәләп қиливатқан пакистандики қораллиқ гуруппилар хитайниң мәблиғи билән елип бериливатқан бу қурулушлардин қаттиқ нарази болуп, улар илгириму бир қанчә қетим хитай пуқралириға нишанлиқ һуҗум қозғиған иди.

Бу йил 4-айда пакистанлиқ бир аял карачи университетиға кирип бәдинигә теңивалған бомбини партлитип, “куңзи иниститути” ниң үч нәпәр хитай оқутқучиси вә бир пакистанлиқни өлтүргән иди. Шу қетимқи “адәм бомба” һуҗумидин кейин, “балуҗистан азадлиқ армийәси” дәп аталған мәзкур тәшкилат өзлириниң шу қетимлиқ һуҗум вәқәсигә мәсул икәнликини җакарлиған иди.

Бундин башқа йәнә 2021-йилидики бомба һуҗумида пакистанда су амбири ясаватқан 13 нәпәр хитай инженери өлгән иди. Хитайларни нишан қилған бу хилдики һуҗумлар пакистанда көп қетим көрүлгән болуп, “хитай-пакистан иқтисадий каридори” қурулушиға нарази болуп келиватқан балуҗистан қораллиқлири һәрқачан мушундақ һуҗумларға мәсул икәнликини ейтип кәлмәктә.