Pakistan bash ministiri: “Xitayning shinjang mesilisidiki heqqaniy meydanini qollaymiz”

Muweqqet pakistan bash ministiri enwer ul heq kakar (Anwar Ul Haq Kakar), 20-öktebir Uyghur rayonida ziyarette bolghan hemde jüme namizini ürümchide oqughan. Xitay hökümet taratqulirining xewerliride, kakarning ma shingruy bilen körüshkende “Xitayning shinjang mesilisidiki heqqaniy meydanini qollaydighanliqi”, shundaqla “Térrorluqqa xitay bilen ortaq zerbe béridighanliqi” ni bildürgenliki qeyt qilinmaqta.

Pakistanning muweqqet bash ministiri kakar, shi jinpingning ötken hepte béyjingda chaqirghan 3-nöwetlik “Bir belwagh bir yol” yighinigha qatniship arqidinla Uyghur rayonida ziyarette bolghan ikkinchi chet'el rehbiridur. Ötken hepte oxshash bir waqitta qazaqistan prézidénti toqayéfmu Uyghur rayonida ziyarette bolup, ma shingruy we erkin tuniyazlar bilen körüshken idi. Halbuki, bu ikki dölet, ötken hepte gherb ellirini asas qilghan 51 dölet b d t da ortaq bayanat élan qilip, xitayning Uyghur rayonidiki siyasitini tenqid qilghandin kéyin, xitayni qollap bayanat élan 72 döletning qataridin orun alghan.

“Shinjang géziti” ning xewiride éytilishiche, ma shingruy pakistan bash ministiri bilen bolghan körüshüshte “Biz ikki dölet rehbiri hasil qilghan muhim ortaq tonushni estayidilliq bilen yolgha qoyimiz, bu qétimliq bashliqlar yighini munbirining netijisini, bolupmu xitayning qollishidiki yuqiri süpetlik ‛bir belwagh bir yol‚ qurulushining sekkiz xil heriket türini emeliyleshtürimiz” dégen. “Shinjang géziti” ning xewiride yene kakarning “Pakistan xitayning shinjang mesilisidiki qanunluq meydanini qet'iy qollaydu hemde shinjang bilen her sahede alaqe, almashturush we öz-ara menpe'et yetküzüsh hemkarliqini kücheytishni ümid qilidu” dégenliki ilgiri sürülgen.

Körüshüshte pakistan bash ministiri kakar yene mundaq dégenliki qeyt qilin'ghan: “Pakistan xitay yürgüzgen türlük siyasetlerni qedirleydu. Xitayning yaxshi bashqurushini xelq'ara jem'iyetke aktip tonushturushni xalaydu. Térrorluq ikki terepning ortaq düshmini, pakistan xitay bilen bir septe ching turup, ashqunluqqa qet'iy qarshi turidu, zorawanliqqa we térrorluqqa ortaq zerbe béridu”.

Firansiye agéntliqining xewiride bildürüshiche, kakarning ‍ishxanisi élan qilghan bu heqtiki bayanatta, rayondiki kishilik hoquq depsendichiliki tilgha élinmighan. Bayanatta peqet kakarning “Shinjangning xitay-pakistan iqtisadiy karidorining chégrasi bolush süpitidiki istratégiyelik ehmiyitige yuqiri baha bergenliki” tekitlen'gen.