Qeshqerdiki “Pakiz énérgiye qurulushi” da 12mi'ing adem qétim “Éshincha emgek küchi” ishqa sélin'ghan

Nöwette xitay da'iriliri Uyghur élide 10 milyon kilowatliq pakiz énérgiye bazisi qurulushini jiddiy élip bériwatqan bolup, bu yil 1 – ayda qeshqerde bashlighan bu qurulush türide yene köpligen Uyghurning mejburiy emgekke séliniwatqanliqi melum bolmaqta.  

“Xitay xewerler tori” ning xewiridin qarighanda pakiz énérgiye qurulushining qeshqerde yolgha qoyulushi bilen yoruqluq woltni qollash türliri, litiy i'onluq bataréye ishlepchiqirish türliri we sim we simliq kabél ishlepchiqirish türliri arqa-arqidin ishqa kirishtürülüp, 12 ming adem qétimdin  artuq yerlik éshincha emgek küchi ishqa orunlashturulghan. Xitay hökümitining Uyghurlarni  köp yillardin béri “Éshincha emgek küchi” dégen nam astida Uyghur élining ichi we sirtidiki zawutlarda mejburiy emgekke sélip  kéliwatqanliqi kishilik hoquq organliri teripidin tekitlen'genidi. Mezkur xewerdin qarighanda qeshqerdiki  mezkur pakiz énérgiye, yeni  quyash énérgiyesi saheside  köp sandiki    “Éshincha emgek küchi”, yeni  Uyghurlarning emgekke séliniwatqanliqi melum bolmaqta. 

“Xitay xewerler tori” ning xewiridin qarighanda, pakiz énérgiye qurulushi boyiche qurulidighan 10 milyon kilowatliq yéngi énérgiye bazisi qeshqerning maralbéshi nahiyesi, yeken nahiyesi we yéngisheher nahiyeliride quruluwatqan bolup, qurulushning bu yil axirighiche pütüshi pilanlanmaqtiken.

Qeshqerdiki bu 10 milyon kilowatliq yéngi énérgiye türi tamamlan'ghandin kéyin, yilliq ishlepchiqiridighan yoruqluq wolt éléktr énérgiyesi texminen 15 milyard kilowat sa'etke yétidighan bolup, u 4 milyon 275 ming tonna ölchemlik kömürge barawer iken.

Xitaydiki pakiz énérgiye sahesi, yeni kün taxta qurulushi Uyghur mejburiy emgiki eng éghir sahelerning biri dep qaralmaqta. Amérika hökümiti bu sewebtin Uyghur élidiki zawutlarda ishlepchiqirilghan kün taxtilarning import qilinishini chekligenidi.Amérika tamozhna we chégra qoghdash idarisi bu yil 6-ayda “Uyghur mejburiy emgékining aldini ‍élish qanuni” resmiy halda ijra qilinishqa bashlighandin béri, mejburiy emgekke chétishliq 1000 din artuq quyash énirgiye taxtisi yollanmisini tutup qalghan idi.