Америка палата әзалири "‍уйғур қирғинчилиқини чәкләш һәркити" ни башлиди

Мухбиримиз әзиз
2021-05-24
Share

Америка һөкүмити "уйғурлар ирқий қирғинчилиққа дуч келиватиду" дегән тарихий һөкүмни елан қилғандин кейин, буниңға мунасип бир қатар тәдбирләр елинишқа башлиди. Йеқинда америка авам вә кеңәш палатасиниң әзалириму бу һәқтики паалийәтләрниң бир қисми сүпитидә "уйғур қирғинчилиқини чәкләш һәркити" ни қозғиди.

Өткән һәптә америка кеңәш палата әзалиридин викий хартзлер вә том свази бирликтә америка дөләт мәҗлисидә "уйғурларни мәҗбурий туғмас қиливетишни чәкләш қанун лайиһәси" ни тонуштурди. Бу қанун лайиһәсидә хитай һөкүмитиниң уйғур қиз-чоканлирини түрлүк тиббий вастиләр арқилиқ пәрзәнтлик болалмас қиливетиштәк қәбиһликлири тәпсилий баян қилиниш билән биргә, уйғурларниң нөвәттики әһвали җанлиқ баян қилинди. Хартзлер ханим бу һәқтә мухбирларға сөз қилип: "америка пуқраси болуш сүпитимиз билән биз сөз вә етиқад әркинликиниң тәхрсизликигә ишинимиз. Шундақ болғаникән, уйғурларниң бу хил инсанийәткә қарши җинайәтләрниң һуҗум обйекти болуп қелишиға қарап туралмаймиз" дегән.

Мәлум болушичә, бу қанун лайиһәси америка президентидин америка дөләт мәҗлисигә мәхсус доклат тапшуруш, буниңда уйғурлар дуч келиватқан ирқий қирғинчилиқни һәл қилишниң қәдәм басқучлирини тәпсилий шәрһиләшни тәләп қилидикән. Шундақла америка ташқий ишлар министириға бу хил зиянкәшликкә учриған аялларға ярдәм бериш һәмдә ашу хил зиянкәшликниң иҗрачилириға җаза елан қилиш тоғрисида көрсәтмә беридикән.

Нөвәттә мәзкур қанун лайиһәси америка авам палатасиниң ташқий ишлар вә әдлийә комитетлириға тапшурулған болуп, җиддий музакирә қилинмақта икән. Әгәр буларниң музакирисидин өтсә у һалда кейинки қәдәмдә палатаниң аваз беришигә сунулидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт