Amérika we chet'ellerde sétiliwatqan kiyim-kécheklerning 19 pirsentide “Shinjang paxtisi” bayqalghan

Amérika hökümiti we bezi gherb döletliri Uyghur mejburi emgikige baghlinishliq dep qaralghan “Shinjang paxtisi” ni cheklesh yaki bayqut qilishta zor tirishchanliq körsetken bolsimu, amérika we chet'ellerde sétiliwatqan kiyim-kécheklerning 19 pirsentide yenila “Shinjang paxtisi” bayqalghan.

Melum bolushiche, amérikadiki Stratum Resorvoir namliq tebi'iy bayliqlar analizi shirkiti bilen qollinishchan DNA ilmiy analizi orni DNA liq tekshürüsh élip bérish arqiliq, amérika we chet'ellerde sétiliwatqan kiyim-kécheklerning 19 pirsentide “Shinjang paxtisi” barliqini éniqlap chiqqan. Bu tetqiqat orunliri 2023-yili 2-aydin 2024-yili 2-ayghiche bolghan ariliqta, amérika we chet'ellerde sétilghan kiyim-kécheklerge qarita DNA liq tekshürüsh élip barghan.

Mezkur tetqiqat netijisi amérika hökümitining “Uyghur mejburi emgikining aldini élish qanuni” ni ijra qilishqa bashlap, Uyghur rayonida ishlepchiqirilghan mehsulatlarning, bolupmu “Shinjang paxtisi” da ishlepchiqirilghan mehsulatlarning amérikigha kirishini tosuwatqinigha ikki yil bolay dégen bir waqitta élan qilin'ghan.

“Roytérs agéntliqi” ning bildürüshiche, tetqiqatta paxta rext, chong tipliq parche sétish magizinliri, torda sétilidighan kiyim-kéchek we ayagh mehsulatlirigha qarita analiz élip bérilghan, emma tetqiqat orni DNA liq tekshürüsh élip bérilghan bu mehsulatlarning qeyerde sétilghanliqini ashkarilashni ret qilghan, peqet “Bu mehsulatlarning amérikada sétiwélin'ghanliqi, shundaqla tordin sétiwélip amérikagha yollap bérilgenliki” ni bildürgen.

Xewerlerde, buning bir muhim bayqash ikenliki, chünki buning dunyada Uyghur diyaridin kelgen paxtini cheklesh tirishchanliqi qanat yayduruluwatqan bir peytte otturigha chiqqanliqini bildürülmekte. Xelq'arada Uyghur diyarida ishlepchiqirilghan “Shinjang paxtisi” ni cheklesh yaki bayqut qilish chuqanliri küchlük bolsimu, lékin Uyghur diyari yenila xitayning asasliq paxta bazisi bolup, xitay omumiy paxta mehsulatining az dégen 85 pirsenti, dunya paxta bazirining 20 pirsentini teshkil qilip kelgen. Stratum Resorvoir Bilen qollinishchan DNA ilmiy tetqiqat ornining analizida körsitilishiche, nöwette, az bolmighan “Shinjang paxtisi” yenila amérikigha kirmekte iken.