Xitayning paxta mehsulatlirigha qoyulghan cheklime xitayni bu sahediki dunya baziridin pütünley siqip chiqiralmaydiken

Muxbirimiz jewlan
2022.07.27
Share on WhatsApp
Share on WhatsApp

Amérika “Uyghur mejburiy emgikining aldini élish qanuni” ni ijra qilishni bashlap, xitaydin kélidighan paxta mehsulatlirini chekligendin kéyin, buning tesiri xitaydin halqip, hindistan, bén'gal, wéytnam qatarliq döletlerge kéngeygen.

“Jenubiy xitay etigenlik pochtisi” torining xewer qilishiche, bu yil amérika aldinqi besh ayda xitaydin import qilghan paxta mehsulatliri 21.5 Pirsent bolup, 2020-yildikige qarighanda 3.7 Pirsent töwenligen. Shuning bilen birge bén'galdin import qilghan paxta mehsulatliri 8.4 Pirsenttin 10.2 Pirsentke köpeygen؛ hindistandin import qilghan paxta mehsulatliri 16.5 Pirsenttin 19.2 Pirsentke köpeygen.

Xewerde éytilishiche, bén'gal bilen wéytnamning amérikagha paxta mehsulatlirini éksport qilish miqdari köpeygen bilen, ular paxtini yenila xitaydin import qilidiken. Ular bu paxtini bashqa jaydin import qilghan paxtilar bilen arilashturup, mehsulat ishlepchiqirip amérikagha éksport qilsa, amérika tamozhnisi hazirche uni DNA tekshürüshidek inchke tekshürüp bir terep qilalmaydiken.

Nurghun dangliq markilar Uyghur mejburiy emgikige chétilip qélishtin hemde xitaydiki “Kowidni nölge chüshürüsh” siyasitidin qéchip, xitaydin hindistan'gha yötkilishni ümid qilmaqta iken. Bundaq bolghanda, hindistanning paxta mehsulatlirini ishlepchiqirish we éksport qilish küchi ashidiken. Emma Uyghur rayonidin chiqidighan paxtilargha qoyulghan cheklime hindistanning toqumichiliq sana'itige ziyan yetküzidiken, chünki xitay hazir hindistandinmu paxta import qilidiken.

Xitay xelq'ara iqtisad-soda merkizi ötken yil 5-ayda bir doklat élan qilghan bolup, uningda “Amérikaning Uyghur rayonidin chiqidighan paxtilargha cheklime qoyushidiki meqsetliridin biri, dunyada xitaydin xaliy yéngi tiptiki paxta toqumichiliq mehsulatliri teminlesh linyesi berpa qilish” déyilgen. Emma mezkur doklatta bu meqsetning emelge éshishigha bolghan guman otturigha qoyulghan hemde “Xitayning ishlepchiqirish küchige héchnéme teng kélelmeydu” déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.