Daniye piwa shirkiti karlsbérgning Uyghur rayonidiki sodisi diqqet qozghidi

Dunyagha dangliq daniye piwa shirkitining Uyghur rayoni bilen bolghan sodisi yéqinda daniye taratqulirining qiziq nuqtisigha aylan'ghan. Daniye taratqulirining xewer qilishiche, émil alisé'o ditzél we nirola elima isimlik ikki tetqiqatchining élip barghan tekshürüshidin karlsbérg shirkitining Uyghur rayonidiki yerlik tarmiqi bolghan “Wusu piwisi” yeni shixu piwisining xitay hökümitining Uyghur rayonida yolgha qoyup kelgen mejburiy emgek programmisigha qatnashqanliqi melum bolghan. Tetqiqatchilar yerlik gézitlerning xewerliridin “Wusu piwisi” ning mejburiy emgekke chétishliq ikenliki ashkara bolghanliqini bildürgen.

Daniyediki TV 2 we Media Danwatch namliq taratqularning xewer qilishiche, karlsbérg shirkitining “Wusu piwisi” tarmaq shirkiti 2018-yili xitay hökümiti uyushturghan “Emgek küchi yermenkliri” ge qatnashqaniken. Tetqiqatchilar hökümet uyushturghan mezkur “Emgek küchi yermenkisi” ge ‍altaydiki 1070 nopusi bar bir yézidin 500 din artuq emgek küchining mejburiy élip kélin'genlikinimu éniqlap chiqqan.

Karlsbérg shirkiti özlirining mejburiy emgekke chétishliq ikenlikini ret qilghan bolsimu, lékin mutexessisler bu shirketni Uyghur rayonidiki basturushning bir parchisi bolush we uningdin zor miqdarda payda élish bilen eyibligen. Xewerde yene karlsbérgning “Wusu piwisi” üchün botulka ishlepchiqiridighan turo'andiki shérkitiningmu mejburiy emgekke chétishliq ikenliki bildürülgen.

Xewerde körsitishiche, karlsbérg shirkitining shixu tarmaq shirkiti 2020-yili daniye puligha 9 milyard 900 milyon kronluq soda qilip, bu shirketning xitaydiki omumi yilliq sodisining 4 den bir qismini igiligen. Xewerde yene shixu piwisining shixudiki piwa bazirining 85 pirsentini ‍igilleydighanliqi'i bildürülgen.