Mayk pompéyo: "Xitaydiki musulmanlarni basturushqa shi jinping yolyoruq bériwatidu!"

Muxbirimiz eziz
2020-06-23
Élxet
Pikir
Share
Print

Amérika tashqi ishlar ministiri mayk pompéyo 19-iyun küni yene bir qétim xitay hökümitining xongkong mesilisidiki jawabkarliqini tekitlep, xongkongdiki démokratiye namayishini basturushning xitay kompartiyesi chüshürgen buyruq boyiche otturigha chiqqan hadise ikenlikini bildürdi. Shuningdek "Xitay tewesidiki musulmanlargha qaritilghan basturush qilmishigha shi jinping yéshil chiragh yéqip bériwatidu. Öz puqralirini basturush qilmishi héchqachan nochiliq yaki danaliq bolghan emes" dep körsetti.

Mayk pompéyo bu sözni daniyening paytexti kopénhagin shehiride xizmet ziyaritide boluwatqanda éytti. U tiwittér bétide tarqitilghan nutqida amérika hökümitining nöwette kim bilen néme toghriliq sözlishiwatqanliqini yaxshi bilishi lazimliqini, chünki hazir bu hadisining pütün dunyaghila emes, amérikadiki her sahege bekmu ashkara boluwatqanliqini, xongkongdiki démokratiye telipini qopalliq bilen basturuwétishning xitay xilapliq qiliwatqan köpligen xelq'araliq ehdinamilerning biri ikenlikini alahide tekitlidi.

Mayk pompéyo sözide hazir xitay kompartiyisi we shi jinpingning bir qolluq layihelishi bilen wujudqa chiqiwatqan kishilik hoquq depsendichilikining ikkinchi dunya urushidin buyanqi eng zor sewiyege wekillik qiliwatqanliqini, xitay xelq azadliq armiyesining hindistan chégrasida we qanunsiz zémin dawasi qiliwatqan jenubiy xitay déngizida jiddiy weziyet peyda qiliwatqanliqini buninggha tipik misallar qatarida alahide tilgha aldi.

Melum bolushiche, mayk pompéyo hazirgha qeder xitay hökümitining Uyghurlargha qiliwatqan ziyankeshliklirini köp qétim ashkara we keskin ibariler bilen tenqidligen bolup, uning "Xitay hökümitining Uyghurlargha qiliwatqanliri 21-esirning yüzige chüshken dagh" dégen sözi köpligen muhakime sorunlirida neqil éliniwatqan meshhur eqliyelerning biri bolup qalmaqtiken.

Toluq bet