Mayk pompéyoning erkin dunyani kommunistik xitayni özgertishke chaqirishi xelq'arada küchlük inkas qozghidi

Muxbirimiz erkin
2020.07.24

Amérika tashqi ishlar ministiri mayk pompéyoning 23-iyul amérikaning kaliforniye shtatidiki nikson kutupxanisida nutuq sözlep, erkin dunyani kommunistik xitayni özgertishke chaqirishi xelq'arada küchlük inkas qozghidi.

Mayk pompéyo nutqida “Eger erkin dunya kommunistik xitayni özgertmise, kommunistik xitay dunyani özgertidu,” dep tekitligen. U nutqida ikki qétim Uyghurlarni tilgha alghan. “Wal strét zhurnali” gézitining tekitlishiche, pompéyoning sözi “Tramp hökümitining xitaygha qarita toluq heriketke ötkenlikini chüshendüridiken.”

Roytérs agéntliqining xewiride mayk pompéyoning sözi “Amérika-xitay munasiwiti eng töwen chekke chüshüp qalghan, xitaygha kimning eng qattiq turidighanliqi 11-aydiki saylamning aldida prézidént tramp bilen uning riqabetchisi jo baydén otturisidiki riqabetke aylan'ghan mezgilge toghra kelgenliki” tekitlen'gen. Amérikadiki “Töpilik” (The Hilll) gézitining tekitlishiche, pompéyo sözide amérikaning xitay bilen bolghan kelgüsi munasiwitini “Erkin dunya bilen zomigerlik otturisidiki jeng” dep yekünlep, xelq'ara ittipaqdashlirini béyjingning xaraktérini özgertish heqqide bésim ishlitishke ündigen.

En'gliye chiqidighan “Télégraf” gézitining xewiride mayk pompéyoning erkin dunyani “Frankishtayin (gherb edebiyatidiki ademsiman meqluq) xitayning yéngi zomigerliki üstidin ghalip kélishke chaqirghanliqi” ni bildürgen. Xongkongda chiqidighan “Jenubiy xitay etigenlik pochtisi” géziti 24-iyul élan qilghan bu heqtiki teqrizide mutexessislerning sözi neqil keltürülüp, 1979-yili bashlan'ghan amérika-xitay munasiwetlirining axirlishish xewpige duch kelgenliki tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.