Майк помпейо уйғур дияридики кишилик һоқуқ дәпсәндичилирини җазалашни алқишлиди

Мухбиримиз әзиз
2020-07-31
Елхәт
Пикир
Share
Принт

Америка малийә министирлиқи 31-июл күни уйғурлар дияридики сиясий бастуруш вә кишилик һоқуқ дәпсәндичиликигә четишлиқ, дегән әйиб билән аталмиш «шинҗаң ишләпчиқириш вә қурулуш биңтуәни» ниң илгирики вә һазирқи рәһбәрлирини «йәршари магинтиски қануни» бойичә җазалиғанлиқини елан қилғаниди. Америка ташқи ишлар министири майк помпейо бу хәвәрдин кейин дәрһал бу һәқтә ашкара баянат елан қилип, өзиниң бу қарарни қизғин алқишлайдиғанлиқини билдүрди.

Америка ташқи ишлар министирлиқиниң тор бетидә елан қилинған баянатта майк помпейо «хитай компартийәсиниң шинҗаңдики уйғурларға вә башқа мусулманларға қарши иҗра қиливатқан кишилик һоқуқ дәпсәндичиликини мушу әсирниң йүзигә чүшкән дағ, дейишкә болиду. Трамп һөкүмити хитай һөкүмитиниң зулум, зор тутқун, юқири пән-техникилиқ назарәт, мәҗбурий әмгәк вә мәҗбурий нопус контроллуқи қатарлиқ бир қатар қилмишлириға қарши дуняви тиришчанлиққа йетәкчилик қилип кәлди. Биз бу принсипал һәрикәтни давам қилдурмақчимиз» деди.

Баянатта 2020-йили 9-июлда америка һөкүмитиниң уйғурлар дияридики биринчи номурлуқ әмәлдар, шундақла «биңтуән» ниң биринчи сиясий комиссари чен чуәнгони «қара тизимлик» кә киргүзгәнлики, уйғурларни бастурушта «биңтуән» ниң биваситә җавабкарлиқи болғанлиқи үчүн әмдиликтә «биңтуән» ниң һәмдә униң илгирики вә һазирқи рәһбәрлириниңму бу тизимликкә киргүзүлгәнлики алаһидә тәкитлиниду.

Майк помпейо баянатниң ахирида дунядики барлиқ дөләтләрни хитай компартийәсиниң барғансери юқири пәллигә чиқиватқан дәпсәндичилик қилмишлирини әйибләшкә, шундақла өзлириниң һәққанийәт сепигә қетилишқа чақирди.

Пикирләр (0)
Share
Толуқ бәт