“Mayk pompéyo bilen kechlik parang: xitay xelqige yollan'ghan uchur” namliq programma yolgha qoyuldi

Muxbirimiz irade
2022.09.15
Share on WhatsApp
Share on WhatsApp

Amérikadiki nopuzluq istratégiye tetqiqat merkizi bolghan “Xodson inistituti” yéqinda “Mayk pompéyo bilen kechlik parang: xitay xelqige yollan'ghan uchur” namliq yürüshlük programma yolgha qoyghan.

Bu programmida amérikaning 70-nöwetlik sabiq tashqi ishlar ministiri mayk r. Pompéyo (Michael R. Pompeo) Xitay xelqige xitaben söz qilip, ulargha xitay kompartiyesining mahiyiti we uning amérika bilen bolghan munasiwiti heqqide sözleydiken.

Mezkur yürüshlük programmining birinchi qismi 14-séntebir küni hem xodson inistituti tor bétide hem yuwtup torida tarqitilghan. Sabiq tashqi ishlar ministiri mayk pompéyo birinchi bölümde nuqtiliq halda xitay kompartiyesining xitay xelqige wekillik qilalmaydighanliqi, xitay kompartiyesining xitay xelqining menpe'etini chiqish qilip emes, belki özining hakimiyitini qoghdash bedilige heriket qilidighan bir mustebit hakimiyetlikini chüshendürgen.

U mundaq dégen: “Xitay kompartiyesi teshwiq qilip kelgen eng chong yalghanchiliq shuki, u xitaygha we xitay medeniyitige wekillik qilidu. Méningche xitay kompartiyesi buning yalghanliqini bilidu. Eger ular özini heqiqeten xitay xelqige wekillik qilidu dep qarighan bolsa, u halda uning xitay xelqini basturush we nazaret qilishqa serp qilghan dölet ichi mudapi'e chiqimi dölet sirtigha qaratqan mudapi'e chiqimidin köp bolmighan bolatti. Eger u heqiqeten xitay xelqige wekillik qilghan bolsa, u halda u erkin we adil saylam ötküzgen bolatti. Emma u undaq qilmaydu. Chünki bu atalmish xelq jumhuriyiti emeliyette öz xelqige qarshi.”

Melum bolushiche, bu programma xitay hökümitining kishilik hoquq xatirisi qatarliq nurghun ijtima'iy mesililer toghrisida xitay xelqini melumat igisi qilishni meqset qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.