2021-Йиллиқ “америка уйғур лоңқиси” путбол мусабиқиси ахирқи таллаш басқучиға кирди

Мухбиримиз әзиз
2021.09.06
Share on WhatsApp
Share on WhatsApp

Америкадики уйғур җамаитиниң 2015-йилидин буян давам қиливатқан “америка уйғур лоңқиси” путбол мусабиқиси бирнәччә күнлүк җиддий елишиштин кейин 6-сентәбир күни ахирқи һәл қилғуч мусабиқә басқучиға кирди.

2-Сентәбир башланған 6-нөвәтлик мусабиқиниң ечилиш мурасимидин кейин “уйғур бирләшмиси”, “марийланд уйғур командиси”, “бостон уйғур командиси”, “изчилар командиси”, “сан-франсиско уйғур командиси” қатарлиқ алтә команда җиддий мусабиқини башливәткән иди. Бирнәччә күнлүк мусабиқә арқилиқ ахирқи һәл қилғуч мусабиқә басқучи йеқинлап кәлди. Болупму өткән икки йилда таҗсиман вируси түпәйлидин аммиви йиғилиш паалийәтлири зор чәклимигә учриғанлиқтин мәзкур мусабиқиму тохтитип қоюлған иди. Шу сәвәбтинму нөвәттики вәзийәтниң йол қойған даирисидә өткүзүлгән бу мусабиқә америка вә башқа җайлардин кәлгән уйғур җамаитиниң қизғин алқишиға еришти.

Америкадики “уйғур бирләшмиси” командисиниң мәшқавули җүрәт заһирниң билдүришичә, гәрчә бир қисим команда әзалири күтүлмигән сәвәбләр түпәйлидин мусабиқигә келәлмигән болсиму, әмма бу қетимқи мусабиқә йәнила наһайити юқури кәйпиятта давам қилған һәмдә ғәлибилик һалда ахирқи һәл қилғуч басқучиға киргән. Калифорнийә шитатидин кәлгән “сан франсиско уйғур командиси” вә йеңидин қурулған “изчилар командиси” мусабиқә кәйиятиға йеңи мәзмун қошқан.

Америка уйғур җамаитиниң йиллардин буян бу мусабиқини һәр җәһәттин қизғин вә изчил қоллап кәлгәнликидин бәкму миннәтдар икәнликини билдүргән җүрәт заһир: “бу мусабиқә ялғуз путбол тепишла әмәс, техиму муһими уйғур яшлири вә уйғур җамаитиниң бирлик, өмлүк вә өзара чүшинишини алға сүрүш соруниму болуп кәлмәктә,” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.