Президент байден путинниң украина урушида “мәғлуп болғанлиқи” ни билдүргән

Вашингтондин мухбиримиз әркин тәйярлиди
2023.07.14

Бу һәптиниң башлирида шималий атлантик әһди тәшкилатиниң башлиқлар йиғиниға қатнашқан вә арқидин литва билән финландийәдә зиярәттә болған америка президенти җов байден, русийә президенти путинниң украина урушида ғәлибә қилиш “мумкинчилики йоқ” икәнликини, униң урушта “мәғлуп болғанлиқи” ни билдүргән. Вашингтондики “төпилик” гезитиниң хәвәр қилишичә, президент байден бу сөзни 13-июл финландийә президенти саули нинистө билән өткүзгән мухбирлар күтүвелиш йиғинида, украинаниң NATO әза болуши һәққидә бәргән вәдиси путинниң урушни техиму узун давамлаштурушини кәлтүрүп чиқириш-чиқармаслиқиға даир бир соалға қарита ейтқан.

Байденниң ейтишичә, һечқандақ бир дөләт уруш һалитидә турғанда NATO ға қобул қилинмайдикән. У буниң пүткүл иттипақни урушқа сөрәп киридиғанлиқини ейтқан. Президент байден мундақ дегән: “бу путинни давамлиқ уруштин сақлап қаламду-йоқ дегән мәсилигә кәлсәк, буниң җаваби шуки, путин урушта мәғлуп болуп болди”. Байден йәнә мундақ дегән: “әмма ахирида қандақ келишимниң һасил қилиниши, путин вә униң немә қилишни қарар қилишиға бағлиқ. Лекин униң украинадики урушта ғәлибә қилиш мумкинчилики йоқ. У аллибурун бу урушта мәғлуп болуп болди”.

Президент байден бу һәптиниң башлири литва пайтәхти велниуста өткүзүлгән NATO әза дөләтләр башлиқлиқлири йиғиниға қатнашқан. Йиғинда хитайниң дуня бихәтәрликигә елип келиватқан тәһдити нуқтилиқ музакирә қилинған мәсилиләрниң бири болған. NATO Ға әза дөләтләрниң 2 күнлүк йиғини әснасида елан қилған ортақ хитабнамидә, күчлүк сөз-ибариләр билән хитай хәлқ җумһурийитиниң “мәлум болған хириси вә зорлаш характерлик сиясити” ниң иттипақниң мәнпәәти, бихәтәрлики вә униң қиммәт қаришиға хирис пәйда қиливатқанлиқи тәкитләнгән. Ортақ хитабнамидә йәнә хитай билән русийәниң “истиратегийәлик шерикчилик мунасивитини йәниму чоңқурлаштуруп, қаидә-қанунлар асасидики хәлқара тәртипкә бузғунчилиқ қиливатқанлиқи” билдүрүлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.