Путин москвада икки йиғин ечиш алдида турмақта

21 - Декабир күни москва коллектип бихәтәрлик келишими тәшкилати вә явро - асия иқтисадий иттипақиниң йиғини ечилиш алдида турмақта.

Русийәниң “мустәқиллиқ” гезитиниң йезишичә, президент владимир путин 21 - декабир йәни дүшәнбә күни москвада коллектип бихәтәрлик келишими тәшкилатиға әза дөләтләр башлиқлири йиғини шуниңдәк йәнә явро - асия иқтисадий иттипақиға әза дөләтләр башлиқлири йиғини чақириду.

Коллектип бихәтәрлик келишимигә әза дөләтләрниң башлиқлири москвада учришип, дуняниң нөвәттики вәзийити, хәлқаралиқ бихәтәрлик саһәсидики асаслиқ мәсилиләр вә коллектип бихәтәрлик келишими тәшкилатиниң вәзийәт һәққидики қарарлири һәм башқиларни музакирә қилиду.

“оттура асия хәвәрлири”ториниң бу һәқтики учурида ейтилишичә, таҗикистан президенти әма мәли рахман йәкшәнбә йиғинға қатнишиш үчүн москваға йетип кәлгән.

Русийәниң “содигәр” гезитиниң йезишичә, бу күни москва коллектип бихәтәрлик келишимигә әза дөләтләр ташқи ишлар министирилириму йиғин өткүзүп терроризмға қарши күрәш мәсилилирини муһакимә қилидикән.

Коллектип бихәтәрлик келишими тәшкилатиға русийә, әрминийә, беларусийә, қазақистан, қирғизистан вә таҗикистан әза болуп, путин мәзкур дөләтләрниң рәһбәрлири билән йәнә айрим учришишлар өткүзиду.

“мустәқиллиқ”гезитиниң йезишичә, явро - асия иқтисадий иттипақиниң йиғиниға мәзкур иттипаққа әза русийә, әрминийә, беларусийә, қазақистан вә қирғизистан президентлири қатнишиду. Йиғинда мәзкур иттипақниң бир йиллиқ хизмәтлириниң хуласиси чиқирилидикән вә кәлгүси тәрәққият, келәр йиллиқ хамчот вә башқилар муһакимә қилинидикән.