Русийәдә путинниң қайта президент сайлимиға қатнишишиға қарши намайиш өткүзүлди

Мухбиримиз үмидвар
2018.01.28
Share on WhatsApp
Share on WhatsApp

Йәкшәнбә күни русийәниң москва вә санкитпетербург қатарлиқ чоң-кичик шәһәрлиридә президент сайлимиға наразилиқ билдүрүш намайиши йүз бәргән.

Әнглийә б б с агентлиқиниң хәвәр қилишичә, өктичи алексей навалнийниң чақириқи бойичә тәшкилләнгән “сайлиғучилар иш ташлиши” дәп аталған москва вә санкитпетербургдики намайишларниң көлими бир қәдәр чоң болуп, москва шәһиридики намайишта намайишчилар асаслиқи тверский кочиси намлиқ чоң кочида маңған, өктичиләр рәһбири алексей навалний бу йәргичә намайишчилар билән биргә болғандин кейин сақчилар тәрипидин тутуп кетилгән.

Санкитпетербургдики намайишқиму икки миң әтрапида адәм қатнашқан болуп, б б с агентлиқиниң йезишичә, бу қетимқи москва вә санкитпетербургдики намайишта сақчилар намайишчиларға қарита илгирикидәк қопаллиқ қилмиған, йәни кәң даиридә тутқун қилмиған. Әмма намайиш русийәниң һәр қайси җайлиридики 118 чоң-кичик шәһәрдә йүзбәргән болуп, асаслиқи русийәниң башқа шәһәрлиридики намайишта тутқун қилиш еғир болуп, җәмий 250 адәм тутулған. Русийәниң түркий чуваш җумһурийитиниң мәркизи чебоксар билән түркий хәлқ - башқуртларниң башқуртистан җумһурийити пайтәхти уфа шәһиридики намайишта көпрәк адәм тутқун қилинған.

Намайишниң түп мәқсити путинниң президент сайлимиға қатнишишиға қарши туруш болуп, намайишчилар өктичи рәһбәр алексей навалнийниң һазирқи президент путинниң бу йил 3-айда йәнә президент сайлимиға қатнишишиға қарши туруш идийисини қоллаш йүзисидин бу намайишқа қатнашқан. Навалний қатарлиқ өктичиләр русийәдики әмәлдарлар қатлимидики чирикликкә қарши паалийәт қилмақта.

Русийәдә бу йил 3-айниң 18-күни президент сайлими болидиған болуп, путинниң намзатлиқи көрситилгән вә униң қоллиғучилири уни русийәниң қәддини көтүргән, украина, сүрийә мәсилилиридә русийәниң миллий мәнпәәтини қоғдиған дәп мәдһийәлисә, өктичиләр уни мустәбитлик қилмиши билән, йәни өктичи, демократик пикирләргә зәрбә бериш қилмиши билән әйиблимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.