Xitay hökümiti qanunsiz xitay köchmenlirini qayturup kétishke raziliq bildürgen

Roytérs agéntliqining 27-yanwardiki xewiride éytilishiche, xitay hökümiti 27-yanwar küni xitay puqrasi ikenliki jezmleshtürülgen qanunsiz köchmenlerni amérika tewesidin xitaygha qayturup kétishke razi ikenlikidin bésharet bergen.

Amérika pirézidénti donald tramp bu xildiki qanunsiz köchmenlerni élip ketmigen döletlerge qarita tamozhna béji we bashqa iqtisadiy jaza türlirini ijra qilish heqqide söz qilghandin kéyin, bu yéngi tereqqiyatning körülüshi zor diqqet qozghimaqta.

Xewerde éytilishiche, sabiq pirézidént jow baydén dewridiki chégra siyasiti tüpeylidin milyonlighan köchmenler qanunsiz halda amérika chégrasidin ötken bolup, yéngi hökümet bu xildiki qanunsiz köchmenlerni birdek kelgen jayigha qayturush heqqide bir qatar charilerni ishqa salghan. Shu qatarda nechche on minglighan xitay puqralirimu bu xil qayturushning nishanlirigha aylan'ghan. Emma xitay hökümiti amérika teweside turuwatqan qanunsiz xitay köchmenlirige “Aq pasport” dep atilidighan sayahet guwahnamisi tarqitip bérishni keynige sürüp kelmekte iken. Xitay tashqi ishlar ministirliqining bayanatchisi maw ning bu heqte muxbirlargha söz qilip, “Biz amérika qanun da'iriliri bilen köchmenler mesiliside hemkarlishiwatimiz. Qayturulidighan qanunsiz köchmenler mesiliside ularning xitay puqrasi ikenliki we xitay chong quruqluqidin kelgenliki éniqlan'ghandin kéyin qayturup kétimiz” dégen.

Amérika chégrasidin qanunsiz halda top-top bolup ötken minglighan xitay yashlirining eskerlik yéshidiki kishiler ikenliki, bularning kéyinki waqitlarda amérika üchün xewpsizlik mesilisi peyda qilish éhtimalining barliqi buningdin ilgirimu köp qétim tilgha élin'ghan mesile bolup kelgen idi. Emma xitay hökümiti ta hazirgha qeder özlirining bu xildiki qanunsiz xitay köchmenlirini qayturup kétishke mayilliqini bildürüp baqmighan bolup, bu yéngi yüzlinish nöwette türlük texminlerge seweb bolmaqta.