Қарамай-чөчәк төмүр йолида пат йеқинда қатнаш башлинидикән

Мухбиримиз әркин
2019-05-24
Елхәт
Пикир
Share
Принт

Хитай һөкүмити 5 милярд 200 милйон йүән мәбләғ селип ясиған қарамай-чөчәк төмүр йолида 5‏-айниң 30‏-күнидин башлап рәсмий қатнаш башлинидикән. Әгәр мәзкур төмүр йолда рәсмий қатнаш басланса уйғур аптоном районида төмүр йол бармиған һечқандақ вилайәт мәркизи қалмайду.

Хитай һөкүмәт таратқулириниң хәвәр қилишичә, 271 километир узунлуқтики мәзкур төмүр йолниң қарамайдин чөчәккичә болған арилиқиға 3 бекәт қурулған. Қарамай-чөчәк төмүр йол қурулушида 2014‏-йили иш башланған болуп, әсли 2016‏-йилиниң ахирлирида қурулушниң асаси қисми пүтүп болуши, 2017‏-йили 6 ‏-айда пүтүн қурулуш тамамлиниши керәк иди. Лекин, қурулушниң кечикип, униңда әмди қатнаш башлинишиниң сәвәби мәлум әмәс.

Хитай таратқулирида қурулушниң кечикиш сәвәбигә һечқандақ чүшәнчә берилмигән. Мәзкур төмүр йол қурулуши хитай һөкүмити уйғур, қазақ, қирғиз қатарлиқ йәрлик милләтләрни кәң өләмлик тутқун қилип, уларни йиғивелиш лагерлириға қамиған, шуниңдәк пүтүн районда дигитал назарәт системиси қуруп, уйғурларни омумйүзлүк тәқиб астиға алған бир мәзгилдә тамамланған.

Хитай һөкүмити өткән йили йиғивелиш лагерлиридики миңлиған уйғурни хитайниң ичкири өлкилиридики түрмиләргә йөткәштә төрмүр йолға таянған. Радийомиз, даириләрниң уйғур тутқунлирини төмүр йол арқилиқ гәнсу, чиңхәй, шәнши, ички моңғул, хейлоңҗяң, хенән қатарлиқ өлкиләрдики түрмиләргә йөткигәнликини дәлиллигәниди.

Мәлум болушичә, қарамай-чөчәк төмүр йоли тарбағатайниң толи, дөрбилҗин наһийәлиридин өтүп чөчәккә баридикән. «Шинҗаң гезити» ниң хәвиридә нәқил кәлтүрүлүшичә, тарбағатай вилайәтлик тәрәққият-ислаһат комитетиниң муавин мудири малин мәзкур төмүр йол «шинҗаңниң ичи вә сиртидики меһманларниң чөчәккә келип зиярәт, саяһәт вә сода қилишиға қулайлиқ яритипла қалмай, чөчәкниң мол кан байлиқини сиртқа йөткәштики алтун йол» икәнликини тәкитлигән.

Пикирләр (0)
Share
Толуқ бәт