Xelq'ara kishilik hoquq teshkilatliri "Qaraqash höjjetliri" ge inkas bildürdi

Muxbirimiz erkin
2020-02-21
Élxet
Pikir
Share
Print

17‏-Féwral küni xelq'ara taratqularda ashkarlinip, dunyada zor ghulghula qozghighan "Qaraqash höjjetliri" kishilik hoquq teshkilatlirining küchlük inkasini qozghimaqta.

Gérmaniyediki "Tehdit astidiki xelqler jem'iyiti" bayanat élan qilip, gérmaniye we yawropa ittipaqining "Bu jinayette jawapkarliqi bar shexsler" ge imbargo qoyushini telep qilghan. Mezkur teshkilatning bayanatida tektilishiche, "Gérmaniye we yawropa ittipaqi xitay-yawropa bashliqlar yighinida uning istiratégiyelik shériki bolghan xitayning insaniyetke qarshi jinayitini hel qilishi, bu ishni qoshumche tilgha élip qoyupla ötüp ketmesliki kérek" iken.

Bayanatta mezkur teshkilatning diréktori ulréx déli'usning sözi neqil keltürülüp: "Bu jinayette jawabkarliqi bar shexslerning yawropagha kirishige yol qoyulmasliqi shundaqla gérmaniye shirketliri özlirining shinjangdiki pa'aliyetlirini qayta közdin kechürüshi kérek" déyilgen. Bu nöwetlik yawropa-xitay bashliqlar yighini bu yil séntebirde gérmna'iyening laypzig shehride ötküzülidiken. 

"Tehdit astidiki xelqler jem'iyiti" ning bildürüshiche, bu yighinda yawropa ittipaqi "Özining qimmet qarshida ching turup, renggini namayen qilishi kérek" iken. Shuning bilen bir waqitta yene xelqara kechürüm teshkilati munasiwetlik hökümetlerning kéler heptidiki b d t yighinida b d t kishilik hoquq ali komissarining Uyghur rayonida musteqil tekshürüsh élip bérishini qollishini telep qilghan. Bu pikirni mezkur teshkilatning ali derijilik tetqiqatchisi maya wang 20‏-féwral élan qilghan bu heqtiki maqaliside otturigha qoyghan. U "Qaraqash höjjetliri" xitayning shinjangdiki qorqunchluq qilmishlirini téximu köp deliller bilen teminligenlikini bildürüp: "Her qaysi döletlerning buningda jawapkarliqi bar chén chüen'godek emeldarlargha imbargo yürgüzüshi kérek" likini bildürgen. Uning tektilishiche, bu arqiliq "Béyjinggha uning shinjangdiki basturushining jawapkarliqtin qéchip qutulalmaydighanliqini bildürüp qoyushi kérek," iken.

Toluq bet