Үрүмчи қатнаш вәқәсидә өлгән балиниң дохтурға апирилмай қансирап өлүши муназирә қозғиди
2013.04.29
Икки күндин буян тор бекәтлиридә үрүмчи булақ беши кочисидики қатнаш вәқәсидә өлгән балиниң дохтурға апирилмай қансирап өлүш вәқәси муназирә қозғимақта.
Хитайниң ч ч тори вә хәлқара аммиви тор бекити фәйсбок қатарлиқларға йолланған учурлардин мәлум болушичә,47 - апрел үрүмчи вақти саәт 12:30 да үрүмчи булақбеши кочисидики коча аптобус бекитигә йеқин җайда,12 яшлар әтрапидики бир уйғур өсмүрни қатнаш сақчисиниң аптомобили соқуп яриландурған. Тор бекәтлиригә йолланған 3 минут әтрапидики синалғуда вәқә йүз бәргәндин кейин әтраптики амма балини дәрһал дохтурханиға апиришни тәләп қилған болсиму, әмма қатнаш сақчилириниң тосқунлуқ қиливатқан көрүнүши әкс әткән. Синалғу астидики чүшәндүрүштә “қатнаш вәқәси болуп 30 минуттин кейин қутқузуш аптомобили келип бала дохтурханиға елип меңилған болсиму, әмма балиниң зиядә қансираш сәвәбидин өлгәнлики” хәвәр қилинған.
Вәқә һәққидә йезилған инкасларда, қатнаш сақчилириниң вәқә йүз бәргән җайни бузмаслиқни баһанә қилип, қутқузуш вақтини кечиктүрүп, бир өсмүрниң өлүшигә сәвәб болғанлиқи, хитайда сақчиларниң инсанларниң һаяти билән қилчә кари болмайдиған характери әйибләнгән.