Xitay j x ministiri Uyghur élini dawamliq qattiq kontrol qilidighanliqini bildürgen

Xitay jama'et xewpsizlik ministiri wang shyawxung Uyghur élige qilghan ziyaritide rayon bixeterlikining xitay dölet bixeterliki we iqtisadiy tereqqiyatidiki ornining muhimliqini körsitip, rayonning siyasiy bixeterliki we ijtima'iy muqimliqigha kapaletlik qilish kéreklikini alahide tekitligen.

“Shinxu'a agéntliqi” ning xewirige asaslan'ghanda, xitay j x ministiri wang shyawxung 19-öktebirdin 21-öktebirgiche Uyghur élini ziyaret qilip xitay re'isi shi jinpingning hazirqi iqtisadiy weziyet we iqtisadiy xizmetler toghrisidiki muhim sözining rohini etrapliq tetqiq qilish we yolgha qoyushning zörürlükini tekitligen. U mundaq dégen: “Shinjangning jama'et xewpsizlik organliri choqum küchlük siyasiy sadaqetmenlikni berpa qilip, xeterning aldini élish we bixeterlikke kapaletlik qilish üchün türlük wezipilerni aktipliq bilen ada qilip, térrorluqqa qarshi turup siyasiy bixeterlik we ijtima'iy muqimliqni saqlash lazim”.

Xitay hökümiti uzundin buyan “Shinjangni qanun boyiche idare qilish” dégenni kötürüp chiqip, Uyghur élini chet ellik mutexessisler éytqandek “Saqchi döliti” ge aylandurghan bolsa, “Térrorluqqa zerbe bérip muqimliqini qoghdashni da'imlashturush” ni izchil tekitlep, Uyghurlarni dawamliq we keng-kölemlik basturushni dawam qilip kelmekte.

Uyghur éli we we xitay weziyitini közitiwatqan analizchilar xitay jama'et xewpsizlik ministiri wang shyawxung qatarliq xitay emeldarlirining rayonning siyasiy bixeterliki we ijtima'iy muqimliqigha kapaletlik qilish kéreklikini da'im tekitlishini, Uyghur élidiki siyasiy kontrolluqning bundin kéyinmu dawam qilidighanliqi, belki téximu qattiq we jiddiy türde ijra qilinidighanliqining béshariti dep qarimaqta.