Чен чуәнго қурбан һейт алдида йәнә бир қетим қаттиқ зәрбә беришни тәкитлиди

Мухбиримиз ирадә
2017.08.31

Чәтәлләрдики уйғур тәшкилатлири вә кишилик һоқуқ органлири уйғур елидики сиясий бесимниң чидиғусиз дәриҗидә еғирлиқини тәнқид қиливатқан бир мәзгилдә, уйғур райониниң хитай партком секретари чен чуәнго “муқимлиқ хизмити телевизийә йиғини” чақирип, һәрқайси җайларда “бирикмә мушни” қаттиқ етишни йәнә бир қетим тәкитлигән.

Тәңритағ ториниң хәвиридин мәлум болушичә, у бу йиғинни уйғур елидә қурбан һейтлиқ дәм елиш башлаш алдида йәни, 30- авғуст күни әтигәндә чақирип, “үч хил күчләр” гә қарши елип бериливатқан җәңни қәтий бошаштуруп қоймаслиқни тәләп қилған.

У сөзидә үч хил күчләргә зәрбә бәргәндә “қаттиқ зәрбә бериш, уйғур елиниң һазирқи “террорлуққа қарши туруп муқимлиқни сақлаштики һалқилиқ пәйтни яхши тонуп, қаттиқ зәрбә бериш юқири бесимлиқ һалитини қәтий сақлашни вә бу арқилиқ 18- өктәбир күни ечилидиғанлиқи елан қилинған 19- қурултайниң бейҗиңда оңушлуқ ечилишиға капаләтлик қилиш” ни тапилиған.

Көзәткүчиләр, чен чуәнго уйғур елигә кәлгәндин буян сақчи қошунини зор дәриҗидә кеңәйтиш, тәқиб вә қамални ашуруш, интернет учурни қамал қилишни күчәйтиш арқилиқ уйғур елини “сақчи дөлити” гә охшитип қойди, дәп уни әйиблимәктә.

Бирақ, юқиридики сөзләр униң бу сиясәтлиридин қисқа муддәт ичидә ваз кәчмәйдиғанлиқидин дерәк бәрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.