Һиндонезийәдики 3 нәпәр уйғурниң буниңдин бир қанчә күн аввал хитайға өткүзүп берилгәнлики илгири сүрүлмәктә

Мухбиримиз әркин
2020-10-30
Share

Һиндонезийәдә қамақ җазаси тошуп қоюп берилгән 3 нәпәр уйғурниң америка ташқи ишлар министири майк помпейо һиндонезийәгә келиштин 2-3 күн бурун хитайға өткүзүп берилгәнлики илгири сүрүлмәктә.

"җәнубий хитай әтигәнлик почтиси" гезитиниң 30-өктәбир хәвәр қилишичә, исмини ашкарилашни халимайдиған бир һиндонезийә бихәтәрлик әмәлдари 3 нәпәр уйғурниң майк помпейо келиштин 2-3 күн аввал "хитай һөкүмитиниң бир мәхсус айропиланида хитайға қайтурулғанлиқи" ни билдүргән. Америка ташқи ишлар министири майк помпейо һиндонезийә зияритидә һиндонезийә мусулманлирини хитайниң уйғурларни бастурушиға қарши һәқ мәйданда турушқа чақирған.

У 29-өктәбир һиндонезийәдики бир мусулманлар тәшкилатиниң яшлириға нутуқ сөзләп, мусулманларни "йүрикигә қолини селип беқишқа, пакитларға қарашқа, қирғинчилиқтин аман қалғанлар вә уларниң аилисидикиләрниң кәчмишини аңлап беқишқа" чақирған иди. Лекин "җәнубий хитай әтигәнлик почтиси" ниң тәкитлишичә, һиндонезийә бихәтәрлик әмәлдари хитай билән түркийәдин бу үчәйләнниң өз пуқралири икәнликини испатлишини тәләп қилғанлиқи, "пәқәт хитайла уларниң һазирму шинҗаңда яшаватқан уруқ-туғқанлириниң д н а әвришкиси билән тәминлигәнлики" ни билдүргән.

Бу әмәлдарниң тәкитлишичә, "уларниң хитай пуқраси икәнлики испатланғанлиқи үчүн хитайға қайтурулған икән." лекин кишилик һоқуқни көзитиш тәшкилати һиндонезийә һөкүмитиниң бу қарарини "рәһимсизлик" дәп әйиблигән. Мәзкур тәшкилатниң асия ишлири директори брәд адамс: "һиндонезийә һөкүмити хитай һөкүмитиниң уйғурларға даим зиянкәшлик қилидиғанлиқини билиду. Һалбуки, улар бу кишиләрни зиянкәшликкә учраштин қоғдаш мәсулийитиниң орниға рәһимсиз бир қарар чиқарғандәк қилиду," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт