Қазақлар мәсилиси хитай-қазақистан мунасивитигә сайә ташлимақта

Мухбиримиз әзиз
2017-08-09
Елхәт
Пикир
Share
Принт

Өткән 20 йил мабәйнидә сиясий, иқтисад вә сода һәмкарлиқи асасида инақ қошнилардин болуп келиватқан хитай билән қазақистан оттурисидики мунасивәткә дәз кетиватқанлиқи һазир барғансери рошәнлишишкә башлиди.

Мәлум болушичә «бихәтәрлик»кә даир мәсилиләр буниңдики асаслиқ сәвәб икән.

«Азадлиқ радийоси» ниң бу һәқтики хәвиридә ейтилишичә, хитай һөкүмити уйғурлар диярида иҗра қиливатқан «бөлгүнчиликкә вә әсәбийликкә қарши» күрәшләр, шуниңдәк хитай рәиси ши җинпиңниң «төмүрдин соқулған сәддичин арқилиқ шинҗаңни қоғдаш» тәшәббуси түпәйлидин уйғурлар дияридики сиясий күрәшләр үзлүксиз кеңәйгән. Буниң билән уйғурлар дияридики қазақларму бу күрәшниң қурбанлириға айланмақта икән. Қазақлардин мушу сиясий күрәшкә бағлинип қолға елинғанлар вә түрмидин өлүки чиқиватқанлар көпийишкә башлиған.

Һалбуки «азадлиқ радийоси» ниң бу һәқтики хәвиридин мәлум болушичә, хитай билән қазақистан оттурисидики иқтисадий һәмкарлиқ бәкму қоюқ давам қиливатқан болғачқа, қазақистандики һөкүмәт башқуруватқан ахбарат васитилири уйғурлар дияридики қазақларниң әһвалини көрмәскә селивалмақта икән. Қазақистан һөкүмити болса хитайдики қазақлар дуч келиватқан мүшкүлатлар һәққидә сөз қилиштин өзлирини әпқачмақта икән. Буниң билән июн ейида бир түркүм қазақ зиялийлири қазақистан президенти нурсултан нәзәрбайефқа бу мәсилини инкас қилип «хитайдики қазақларға ярдәм бериш бизниң мәҗбурийитимиз» дегән.

Мәлум болушичә, аз сандики қазақистан пуқралири оттура шәрқтә террорлуқ паалийәтлиригә қатнашқан болсиму, бу пүткүл қазақларни радикаллиққа яки террорлуққа бағлашқа йетәрлик пакит болалмайдикән. Әмма шундақ болсиму, қазақистан һөкүмити йәнила «йепиқ қазан йепиқчә қалсун» шәклидә иш көрмәктә икән. Уйғурлар дияридики юқири дәриҗилик әмәлдарлардин җу хәйлун бу мәсилә һәққидә тохтилип «қазақистанда хитайдики қазақларға мунасивәтлик тәшвиқат паалийитини тегишлик йосунда тәшкиллимәй болмайду» дегән.

Пикирләр (0)
Share
Толуқ бәт