Түркмәнистан қазақистан билән болған чеграсини бәш күн тақиғанлиқини елан қилған иди

Қазақистанда қораллиқ һуҗум вәқәси йүз берип узун өтмәй түркмәнистан даирилири бихәтәрлик тәдбирлирини күчәйтиш үчүн 20 - июл қазақистан билән болған чеграсини бәш күн тақиғанлиқини елан қилған иди.

Азадлиқ радиосиниң хәвәр қилишичә, бу һәқтә тохталған қазақистан маңғистав районидики һөкүмәт хадимлириму түркмәнистанниң юқириқи қарарини дәлиллигән.

Улар баянатида мундақ дегән: “түркмәнистан бихәтәрлик тәдбирлирини күчәйтти, шуңа чәтәл пуқралириниң керишини бәш күн тохтитатти.”

Улар йәнә пәқәт маңғистав районида яшайдиған қазақ пуқралириниңла түркмәнистанниң йеқин әтрапидики йезилириға визисиз 5 күн баралайдиғанлиқини билдүргән.

Түркмәнистан қазақистанниң каспий деңизиға тутишидиған маңғистав райони билән чегрилинидиған болуп, икки тәрәпниң ө - ара тутишидиған омумий чеграси 413 километирға йетиду.

Түркмәнистан даирилириниң бу қетим қазақистан билән болған чеграсини тақаш қарариға зади немә сәвәб болғанлиқи мәлум әмәс. Әмма, бу қарарниң қазақистанда йүз бәргән қораллиқ һуҗум вәқәсигә әгишипла елан қилиниши диққәт чәкмәктә.

19 - Июл қазақистанниң алмата шәһиридә бир қораллиқ адәм сақчи вә пуқраларға һуҗум қилған. Һуҗумда 3 сақчи хадими вә бир пуқрани өз ичигә алған 4 адәм өлтүрүлгән.

Гумандар һуҗумдин кейин машина билән қечип кәткән болсиму, кейин қолға чүшкән иди.

Қазақистан президенти бу һуҗумни террорлуқ һәрикити дәп атиған иди.