Türkmenistan qazaqistan bilen bolghan chégrasini besh kün taqighanliqini élan qilghan idi

Muxbirimiz jüme
2016-07-24
Share

Qazaqistanda qoralliq hujum weqesi yüz bérip uzun ötmey türkmenistan da'iriliri bixeterlik tedbirlirini kücheytish üchün 20 - iyul qazaqistan bilen bolghan chégrasini besh kün taqighanliqini élan qilghan idi.

Azadliq radi'osining xewer qilishiche, bu heqte toxtalghan qazaqistan mangghistaw rayonidiki hökümet xadimlirimu türkmenistanning yuqiriqi qararini delilligen.

Ular bayanatida mundaq dégen: "Türkmenistan bixeterlik tedbirlirini kücheytti, shunga chet'el puqralirining kérishini besh kün toxtitatti."

Ular yene peqet mangghistaw rayonida yashaydighan qazaq puqraliriningla türkmenistanning yéqin etrapidiki yézilirigha wizisiz 5 kün baralaydighanliqini bildürgen.

Türkmenistan qazaqistanning kaspiy déngizigha tutishidighan mangghistaw rayoni bilen chégrilinidighan bolup, ikki terepning ö - ara tutishidighan omumiy chégrasi 413 kilométirgha yétidu.

Türkmenistan da'irilirining bu qétim qazaqistan bilen bolghan chégrasini taqash qararigha zadi néme seweb bolghanliqi melum emes. Emma, bu qararning qazaqistanda yüz bergen qoralliq hujum weqesige egishipla élan qilinishi diqqet chekmekte.

19 - Iyul qazaqistanning almata shehiride bir qoralliq adem saqchi we puqralargha hujum qilghan. Hujumda 3 saqchi xadimi we bir puqrani öz ichige alghan 4 adem öltürülgen.

Gumandar hujumdin kéyin mashina bilen qéchip ketken bolsimu, kéyin qolgha chüshken idi.

Qazaqistan prézidénti bu hujumni térrorluq herikiti dep atighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet