Қазақистан уйғур сәнәткарлири уйғур диярида өз маһаритини көрситишкә интилмәктә

Чәтәлләрдики уйғурларниң әң көп қисими җайлашқан қазақистан җумһурийитидә уйғур миллий сәнитиниң юқири дәриҗидә раваҗлиниватқанлиқи муәййәнләштүрүлгән болуп, йеқинқи вақитлардин буян қазақистандики яш уйғур сәнәткарлириниң уйғур диярида өз маһаритини көрситишкә болған интилишиниң ешиватқанлиқи билдүрүлмәктә.

Пәрваз сәнәт ториниң учуридин мәлум болушичә, алматадики уйғур өсмурлиридин тәшкилләнгән усул “дилбәр” ансамбили 2 - айда үрүмчидә ечилидиған хәлқаралиқ усул фестивалиға қатнишишқа җиддий тәйярлиқ қиливатқан болуп, мәзкур уйғур балилириниң усул ансамбили бир қетим хәлқаралиқ “умид” балилар фестивалида биринчи орунни игилигән икән.

Қазақистандики яш нахшчилардин уйғур қизи муштәри исмайилованиң үрүмчидә өткүзүлгән “йипәк йоли садаси” мусабиқисигә қатнишип, алқишқа еришкәнлики қазақистан яш уйғур сәнәткарлири арисида күчлүк қизиқиш қозғиған иди. Бу һәм қазақистанлиқ уйғур нахша чолпининиң тунҗи қетим үрүмчидики нахша мусабиқисгә қатнишиши иди. Алматада турушлуқ бир уйғур зиялийсиниң ейтишичә, һазир қазақистан уйғур яш талантлири арисида өзлириниң тарихи ана вәтинигә берип, өз маһаритини көрситиш қизиқиши күчәйгән икән.

Йеқинқи йиллардин буян уйғур районидики нахшчиларниң алматаға берип консерт бериши көпәйгән болуп, мөминҗан абликим, абдулла вә башқилар орундиған нахшилар қазақистан уйғурлири арисида алқишқа еришкән.

1990 - Йилларда қазақистанниң җумһурийәтлик уйғур тиятириниң артислиридин мурат әһмиди, рушәнгул илахунова вә башқилар уйғур диярида айлинип консерт берип, у йәрләрдики уйғурларниң алқишиға еришкән иди.