Qazaqistan Uyghur tenheriketchisi xelq'ara chambashchiliq musabiqiside netije qazandi

Uyghurlar qazaqistandiki az nopusluq milletlerning biri bolushigha qarimay, ular arisidin sportning boks, chambashchiliq we bashqa türliri boyiche bir qisim dunya chémpiyonliri, asiya chémpiyonliri shuningdek yene ottura asiya we rusiye da'iriside ötküzülgen musabiqilerning chémpiyonliri yétiship chiqqandin sirt yene türlük xelq'araliq musabiqilerde kümüsh we mis médal alghanlarning sanimu melum salmaqni igileydu. Ene shularning biri Uyghur yigiti ruslan libirof yéqinda teywende ötküzülgen 29-qétimliq xelq'araliq erkin chambashchiliq musabiqiside 2-orunni igiligen.

“Uyghur awazi” gézitining xewer qilishiche, qazaqistanning erkin chambashchiliq saheside 6 qétimliq chémpiyon bolghan ruslan libirof teywende ötküzülgen bu qétimliq musabiqide 70 kilogramliqlar türi boyiche kümüsh médalgha ériship, qazaqistan we Uyghurlar üchün sherep quchqan. 

Melum bolushiche, ruslan libirofning meshqawuli, Uyghur chambashchiliq mahiri alik jelilof bolup, u ilgiri bir qanche qétim asiya we musteqil döletler hemdostluqidiki musabiqilerde chémpiyon bolghan we 2-orunni igiligen tenheriketchi idi.

Xewerdin melum bolushiche, qazaqistan Uyghurliri arisida yéqindin buyan chambashchiliq tenherikiti küchiyishke bashlighan bolup, bu sahede onlighan kulublar qurulghan. “Yarkent” dep atalghan kulubtila Uyghur chambashchiliq meshqawuli yüsüpjan weliyéwning yétekchilikide 70 din artuq yash-ösmür meshiq qilmaqta iken.