Qazaqistanliq Uyghur balilar xelq'ara musabiqide altun médalgha érishti

Ereb birleshme xelipilikining paytexti abu-debide ötküzilüwatqan balilarning “Ju-jitsu”,yeni yaponche özini qoghdash we qoralsiz élishish tenheriket türi boyiche xelq'araliq musabiqige qazaqistan balilar komandisining terkibide qatnashqan ikki neper qazaqistanliq Uyghur ösmür altun médalgha érishken.

Abu-debide ötküzülgen mezkur xelq'araliq ““Ju-jitsu”yeni yaponche élishish musabiqisige qazaqistan ösmürlirining komandisigha mezkur isporti türi boyiche meshqawul armanjan rozaxunof yétekchilik qilghan.

Musabiqe bashlan'ghandin buyanqi üch künlük musabiqe jeryanida qazaqistan komandisi üch altun médal we töt kümüsh médal alghan.

Qazaqistanda rus tilida tarqitilidighan “Perwaz” torida bérilgen bu heqtiki xewerdin melum bolushiche, qazaqistan komandisining yétekchisi armanjan rozaxunofning oghli kamal rozaxunof we qazaqistan jumhuriyetlik “Ju-jitsu” tenheriket birleshmisining mu'awin prézidénti rustem abdusalamofning oghli abdusalam abdusalamof altun médalgha érishken. Bulardin bashqa yene qazaq, rus balilarmu altun, kümüsh we mis médallarni qolgha keltürgen.

“The National” torining xewiride körsitilishiche, 10-apréldin bashlap, 23-aprélghiche ötküzülidighan bu musabiqige 100din artuq dölettin 7 mingdin artuq mahir qatnashqan bolup, ösmür balilarning her qaysi türdiki musabiqisining deslepki üch künidila her qaysi döletlerdin kelgen mahirlar 34 altun médal we 41 kümüsh médalgha érishken.

Melum bolushiche, yekke élishish tenheriketlirining bir türi hésablinidighan “Ju-jitsu” esli yaponiyede peyda bolup, kéyin braziliyede ronaq tapqan we hazir köp döletlerge kéngeygen. Bu, özini qoghdash we qoralsiz halda musht bilen reqibige yénik usulda zerbe bérish maharitini telep qilidighan élishish türlirining biridur. Qazaqistan, özbékistan, rusiye qatarliq ellerdimu bu tenheriketke qiziqish yuqiri bolup, qazaqistandiki Uyghurlar arisidimu bu tür bilen shughullinidighan ösmürler köpiyishke bashlighan idi. Emma Uyghur diyarida bu xil tenheriket türining Uyghurlar arisidiki ehwali namelum.