Қазақистандики сабиқ юқири дәриҗилик һөкүмәт мәслиһәтчиси вә тәтқиқатчи тутқун қилинған

Мухбиримиз сада
2019-07-10
Share

Йеқинда қазақистандики сабиқ юқири дәриҗилик һөкүмәт мәслиһәтчиси, доктор константин сиройежкин «хитай һөкүмити билән һәмкарлишип қазақистан дөләт ичидә җасуслуқ билән шуғулланған» дегән әйибләш билән тутқун қилинған.

Америкада чиқидиған «валситрет журнили» гезитиниң 10-июлдики хәвиригә қариғанда, константин сиройежкин илгири сабиқ совет иттипақиниң дөләт бихәтәрлик комитети, йәни к г б ниң хадими вә хитай ишлири мутәхәссиси болуп ишлигән икән. Қазақистан бихәтәрлик даирилири униң бу қетим тутқун қилиниш сәвәбини қазақистанниң юқири дәриҗидә мәхпий тутулидиған һөҗҗитини хитай җасуслириға йоллап бәргәнликтин болғанлиқини билдүргән.

Хәвәрдә оттуриға қоюлған бир қизиқ нуқта, константин сиройежкин тутқун қилинип бир ай өткәндин кейин қазақистан даирилири бу ишни шу йәрлик таратқуларда елан қилинишиға йол қойған вә буниң бейҗиң даирилириниң оттура асиядики дөләтләрдә күнсайин ешиватқан тәсир күчигә қарита кәм учрайдиған бир аммиви қаршилиқ урунуши икәнлики илгири сүрүлгән.

Хәвәрдә йәнә москвадики юқири дәриҗилик иқтисадшунаслиқ мәктипиниң хитайни тәтқиқ қилғучиси василий кашинниң бу һәқтә сөз қилип, «бу ишниң җәмийәткә ашкарилинишидин қазақистан даирилириниң хитайға қазақистанда бәк һәддидин ешип кәтмәслики вә бәк йирақ йәрләргә қол созмаслиқи һәққидә бир учур бериватқанлиқидин дерәк бериду,» дегәнлики баян қилинған.

«явроасиянет» ториниң хәвәр қилишичә, 62 яшлиқ сйройежкин илгири қазақистан президент мәмурийитиниң анализчи-мәслиһәтчиси, истратегийә тәтқиқат институтида юқири дәриҗилик тәтқиқатчи болуп хизмәт қилған. Мәлум болушичә, у хитайниң ички сиясити, уйғур елидики сиясий-иқтисадий вә милләтләр мәсилиси, қазақистан-хитай мунасивәтлиригә аит көплигән әсәрләрни йезип елан қилғаникән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.