Xitay terep "Qazaqistanning 'esbiylikke qarshi herikitimiz' ni chüshen'gini we qollighini üchün minnetdarmiz" dégen

Muxbirimiz shöhret hoshur
2019-03-29
Élxet
Pikir
Share
Print

Xitay tashqi ishlar ministiri wang yi peyshenbe küni qazaqistan tashqi  ishlar ministiri atamqulof bilen körüshkende qazaqistanning lagérlar mesiliside xitayni toghra chüshen'genliki we qollighanliqi üchün minnetdarliq bildürgen.

Roytérs agéntliqining xewiride eslitishiche, qazaqistan hazirgha qeder Uyghur rayonida lagérlargha soliwélin'ghan qosh wetendashliqi bar qazaqlarni qutuldurush üchün xitay terep bilen belgilik muzakire élip barghan bolsimu, bu mesilige qarita biwasite tenqidiy pikir yaki pozitsiye bildürmigen idi. Xewerlerdin melum bolushiche, qazaqistan yéqinda lagérlar mesilisidiki bayraqdar pa'aliyetchi sérikjan bilashni tutqun, qilip nezerbend astigha alghan. Qazaqistanda ötküzülgen bir sottin kéyin küchlük guwahchi, yighiwélish lagérining sabiq oqutquchisi sayragul sawutningmu awazi peseygen idi.

Melum bolushiche, wang yi atamqulof bilen bu qétimliq körüshüshte lagérlar mesiliside alahide toxtalghan. U atalmish "Terbiyelesh merkezliri" ning diniy esebiylik we zorawanliq idiyesini yoqitish üchün qurulghanliqi we qurulghandin buyan közge körünerlik netijige érishkenlikini eskertken. Xitayning diniy esebiylikke qarshi turushta yaxshi bir ülge yaratqanliqini tilgha alghan wang yi bashqa döletlerni xitayning bu tejribisidin öginishke chaqirghan.

Közetküchiler wang yining bu sözlirini lagérlar mesiliside özige ishinishtin emes, belki künséri ulghyiwatqan xelq'ara jama'et pikrining bésimidin qutulu'ush üchün, yeni özini aqlash üchün qilghanliqini ilgiri sürmekte.

Toluq bet