Qazaqistan hökümiti xitaygha qattiq naraziliq bildürdi

Muxbirimiz eziz
2020-04-14
Élxet
Pikir
Share
Print

Xitay hökümitining teshwiqatlirida ularning qazaqistan hökümitining telipi boyiche "Insanperwerlik yardimi" üchün qazaqistan'gha tébbiy xadimlarni ewetish, ghayet zor miqdardiki tébbiy buyumlarni hediye qilish bilen shughulliniwatqanliqi, buning ikki terep otturisidiki dostluqni kücheytishte ijabiy ehmiyetke ige ikenliki köplep yer éliwatqan idi. Emma qazaqistan axbarat wasitiliri 14-aprél küni ikki terep otturisidiki "Qiziriship qélish" weqesini xewer qildi.

Roytérs agéntliqining xewiride éytilishiche, qazaqistan tashqi ishlar ministirliqi shu küni xitayning qazaqistanda turushluq bash elchisini chaqirtqan hemde xitaydiki "Soxu" torida élan qilin'ghan "Qazaqistan tézdin xitayning bir parchisigha aylinishqa intizar bolmaqta" serlewhilik maqaligha naraziliq bildürgen. Ular xitay elchisige bu ehwalning ikki terep otturisidiki istratégiyilik hemkarliqning rohigha éghir zerer yetküzidighanliqini éytqan.

"Soxu" torida élan qilin'ghan maqalida qazaqistanning qedimdin tartipla xitayning bir qismi bolghanliqi, tarixta xitay sulalilirining ottura asiyagha qaratqan kéngeymichilik urushlirigha qarita qazaqlarning tolimu memnunluq héssiyatida ikenliki, yéqinqi zaman tarixida nurghunlighan qazaq qebile aqsaqallirining xitay impératorlirigha sadiq bolush heqqide qesem bergenliki dégenler tepsiliy bayan qilin'ghan iken.

Xewerde éytilishiche, xitay hökümiti qazaqistandiki néfit we bashqa yer asti bayliqlirini qézishqa meblegh salghuchi asasliq dölet bolup, öz nöwitide qazaqistanning eng chong éksport baziri iken. Emma Uyghur diyaridiki lagérlar mesilisi tashqi dunyagha ashkara bolghandin kéyin, bu lagérlarda melum sandiki qazaqlarningmu barliqi melum bolghan. Shundaqtimu qazaqistan hökümiti xitayni ashkara tenqid qilishqa jür'et qilalmighan bolup, peqet lagérgha qamalghan bir qisim puqralirini yépiq söhbet arqiliq élip kétish usulini qolliniwatqan iken. Emdilikte bolsa xitay tor betliride qazaqistan heqqide qazaqlar xalimaydighan mezmundiki melumatlarning élan qilinishi ikki terep otturisidiki munasiwette deslepki yiriklikni peyda qilghan.

Xitay terep bu heqtiki mesililerge héchqandaq jawab bermigen bolup, "Soxu" toridiki bu maqale uzun ötmey öchürüwétilgen.

Toluq bet