Qazaqistanning "Kaz-inform" namliq xewer orgini Uyghur élidiki ziyaritining tepsilatlirini ashkarilidi

Muxbirimiz irade
2019-01-10
Élxet
Pikir
Share
Print

Yéqinda xitay hökümiti roytérsni öz ichige alghan bir qanche xewer organlirining muxbirlirini Uyghur élidiki lagérlargha ziyaretke orunlashturghanliqini xewer qilghan idi. "Kaz-inform" ene shularning biri bolup, ular 10-yanwar künidiki xewiride bu qétimqi ziyaretning tepsiliy jeryanlirini toluq tonushturghan.

Melum bolushiche, ular bu qétimliq ziyaritide ürümchi, qeshqer we xotende ziyarette bolup, u yerdiki bir qisim lagérlarni ziyaret qilghan. Ular xewirining béshidila yuqiriqi bu ziyaret béketlirining hemmisining xitay hökümiti teripidin orunlashturulghanliqini, özlirining xalighan orun'gha bérip, xalighan kishi bilen xususiy söhbet qilish pursiti bolmighanliqini eskertken. 

Ular xewiride bu xitay hökümiti "Kespiy téxnika bilen terbiyilesh merkizi" dep tonushturghan orunlardiki atalmish "Terbiyelen'güchiler" ning ziyaret qobul qilghanda qilghan sözlirining bir-birige oxshash ikenlikini, ularning hemmisining oxshashla "Özlirining radikal idiyedin zeherlinip, qanun'gha xilapliq qilghanliqi üchün bu yerge terbiyelen'gili kelgenlikini" éytqan. Yene beziliri özlirining bu yerge öz ixtiyarliqi bilen kelgenlikini, hepte axirlirida öyige qaytalaydighanliqini éytqan. 

Halbuki, xitayning bu ziyaretke a'it teshwiqatliri kishilik hoquqni közitish teshkilati we dunya Uyghur qurultiyining tenqidige uchrighan. Ular xitay hökümiti teripidin sehnileshtürülgen bundaq ziyaretlerning héchkimni qayil qilalmaydighanliqini bildürgen. 

Yuqiriqi bu ziyaretke orunlashturulghan roytérs agéntliqimu charshenbe küni ziyaretning jeryanigha a'it körünüshlerni élan qilghanda "Xitay bizning körüshimizni arzu qilghan 'qayta terbiye lagérliri'" dégen mawzuda élan qilghan. 

Xitay hökümiti muxbirlardin bashqa yene qazaqistan, rusiye, pakistan, afghanistan qatarliq 12 dölet déplomatlirinimu oxshash mezgilde ziyaretke orunlashturghan idi.

Toluq bet