Uyghur diyaridiki qedimiy sheher rayonliri “Özgertish” namida weyran qilinmaqta

Muxbirimiz eziz
2021-08-24
Share

Xitay hökümiti bashqurishidiki “Tengritagh” torining 24-awghusttki xewiride éytilishiche, hazirgha qeder Uyghur diyarining herqaysi nahiye we sheherliridiki “Konasheher” namida atalghan rayonlardiki 1600 din artuq mehelle chéqip tashlan'ghan, bu rayonlardin köchürülgen ahale bolsa 200 mingdin ashqan. Nöwette xitay hökümiti buni bir türlük jiddiy wezipe qatarida téximu keng kölemde ijra qilishni tekitlimekte iken.

Xewerde éytilishiche, bu xil “Özgertip qayta qurush” namidiki chéqish herkiti chöchek, ürümchi, sanji, qumul, ghulja qatarliq jaylarning hemmisidila ijra qilin'ghan. Emma bu xil chéqish herkiti xitay hökümitining teshwiqatlirida “Xelq ammisigha bextiyar turmush yaritishning nemuniliri” dégen shekilde chüshendürülmekte iken. Ilgiriki yillarda qedimiy sheher qeshqermu ene shu xil “Puqralarni qalaq turmushtin xalas qilish” dégen namda chéqip tashlan'ghan idi.

Emma muhajirettiki Uyghurlar buning qoyuq siyasiy meqsetni közligen pilanliq buzghunchiliq ikenlikini tekitleydu. Yene beziler bolsa ilgirimu bu xil chéqiwétilgen rayonlarda yéngidin sélin'ghan bina öylerni sétiwélishqa Uyghurlar ilajisiz qalghanliqini, buning bilen bu binalarning pütünley xitay aqqunlirigha “Mukapat” teriqiside hediye qilin'ghanliqini tilgha alidu. Amérikadiki musteqil ‍analizchi élshat hesen bu heqte toxtlip: “Xitay hökümiti mushu yosunda qedimiy puraqqa ige Uyghur mehellilirini chéqip tashlap, bir yaqtin Uyghurlarning milliy kimlikini eslitidighan barliq shey'ilerni yoq qilmaqchi boluwatidu. Yene bir yaqtin, mushu arqiliq sherqiy türkistan'gha kelkündek köchüp kéliwatqan xitay aqqunlirigha olturaq makani yaratmaqchi boluwatidu,” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet