Qedimki tarimliqlar kalining yürikidin girim buyumi yasap ishletken

Yéqinda xitay arxé'ologlar Uyghur rayonining kichik miren qedimiy qebristanliqida qézish élip bérip, Uyghurlarning qedimi ejdadlirigha mensup bir qebridin ikki qizil “Girim tayaqchisi” bayqighan.

Arxé'ologlar tayaqchilarni tejribixanida tekshürüp, uning kala yürikidin yasalghan englik ikenlikini we buningdin 3600 yil burunqi dewrge te'elluq ikenlikini muqimlashturghan.

Bu Uyghur rayonida tunji qétim haywan ichki organliridin yasalghan bu xil girim buyumining tépilishidur.

Shinxu'a agéntliqining xewer qilishiche, mezkur arxé'ologiyilik qézishqa yétekchilik qilghan arxé'olog yang yimin, u buyumning bashqa nersilerni boyashqa ishlitilgenliki éhtimalini chetke qaqmighan bolsimu, emma u: “Qebridin tépilghan ayal quruq jesetning yüzidiki qizil boyaq bizde u tayaqchilar englik, dégen qarashni peyda qildi” dégen.

Bu heqtiki tekshürüsh doklati “Ilim -pen xewerler zhurnili” da élan qilin'ghan. Maqalide körsitishiche, u englik buningdin 3600 burun depn qilin'ghan ayal jesetning yénidiki xurum somkidin bayqalghan.

U ayal jeset qolwaq shekillik tawutqa sélinip, englik, yaghach taghaq qatarliq buyumlar bilen qoshup depn qilin'ghan.

Arxé'ologlarning körsitishiche, mezkur buyumlar buningdin 4000 yil awwalqi kichik miren xelqning turmushi, güzellik qarishi, diniy étiqadi, hüner-sen'iti, girimchilik tarixi heqqidiki tetqiqatlarni muhim matériyal bilen teminleydiken.