Америка қәләмкәшләр мәркизи ши җинпиңни илһам тохти қатарлиқ мәһбусларни қоюп беришкә чақирди

Мухбиримиз әркин
2015.09.18

Америка қәләмкәшләр мәркизи хитай рәиси ши җинпиң америкини зиярәт қилиш һарписида баянат елан қилип, ши җинпиңни атақлиқ уйғур өктичи илһам тохти, журналист гав йү, нобел тинчлиқ мукапати саһиби лю шавбо вә түрмидики башқа виҗдан мәһбуслирини қоюп беришкә чақирди.

Қәләмкәшләр мәркизи җүмә күни елан қилған баянатида йәнә, хитайниң пикир әркинлик вәзийитидин қаттиқ әндишә қиливатқанлиқини билдүргән.

Қәләмкәшләр мәркизи баянатида, түрмидики язғучи, журналистларниң әһвалидин қаттиқ әндишә қиливатқанлиқини әскәртип, “уларниң көп қисми өзлириниң ипадә вә иҗадийәт әркинликини қолланғанлиқи үчүн бу еғир әһвалға қалди. Нөвәттә биз җуңгода түрмигә соланған аз дегәндә 47 нәпәр язғучи вә журналистниң делосини турғузуп чиқтуқ. Улар оттура һесаб билән 8 йил, бәзиләр техиму еғир қамаққа буйрулған. Уйғур зиялийси вә микро блогчи илһам тохти 2014‏-йили 23‏-сентәбир муддәтсиз қамаққа һөкүм қилинди. У торда уйғурлар учриған муамилигә өзиниң пикрини язғанлиқи үчүн бу әһвалға қалди” дегән.

Қәләмкәшләр мәркизи баянатиниң ахирида ши җинпиңға қаритип мундақ дегән, “биз, сизни өзиниң пикрини язғанлиқи үчүн җинайәтчи санилип, түрмигә ташланған язғучи, журналистларни дәрһал қоюп беришкә чақиримиз. Шуниң билән биргә, дәрһал тәдбир қоллинип, җуңго пуқралириниң алақә вә учурға еришиш әркинликини қоғдашни тәләп қилимиз.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.