Хитай "қәшқәр гүли" намлиқ филим арқилиқ хитайларни уйғур елида йилтиз тартишқа чақирмақта

Мухбиримиз ирадә
2020-12-03
Share

Хитай даирилири үч әвлад хитай аилиисниң уйғур елигә көчүп келип йилтиз тартиши баш тема қилинған "қәшқәр гүли" намлиқ бир филим ишлигән.

"хитай хәвәрлири" ториниң бу һәқтики хәвиридин қариғанда, улар филимни тәшвиқ қилиш мәқситидә алди билән филимни 1950-йилларда уйғур елигә көчүрүлгән хитайларниң вәкиллиригә қоюп бәргән.

Хәвәрдә ейитлишичә, уларниң ичидики бири филимни көргәндин кейин мундақ дегән: "биз 20-әсирниң 50-йиллирида гуаңдуңдин шинҗаңға кадир болуп қобул қилинип кәлгән. Әйни вақитта җәмий 11миң адәм бар иди, уларниң көпинчиси оттура вә толуқ оттура мәктәп оқуғучилири иди. Уларниң көпинчиси кәспләр бойичә тәрбийәлинип, шинҗаңниң һәрқайси җайлириға тәқсим қилинған. . . 90 яшқа йеқинлашқан хуаң йүйүнниң ейтишичә, кинодики йүән шөниң дадиси вә бовисиға охшаш нурғун кишиләр шу чағда дөләтниң чақириқиға аваз қошуп, шинҗаңниң қурулушини қоллап, шинҗаңда бир өмүр йилтиз тартти."

Хитай һөкүмити 2017-йили уйғур елида кәң көләмлик тутқунни йолға қоюп, милйонлиған уйғурни лагерларға қамиғандин кейин, йиллардин бери һәр хил шәкилләрдә давам қилдуруп кәлгән юқириқидәк хитай көчмән йөткәш сияситини һәссиләп күчәйткән иди.

Чәт әлләрдики уйғур көзәткүчиләр "қәшқәр гүли" дәп нам берилгән бу филимниң дәл хитай һөкүмити һазир иҗра қиливатқан сиясәтләргә мас һалда, хитайларни йәниму көпләп уйғур елигә көчүп, йилтиз тартип, уйғур елини толуқ ишғал қилишқа үндәш мәқситидә ишләнгәнликини пәрәз қилишмақта.

Мәзкур филим һәққидики хәвәрдә йәнә хитайлар келип йәрләшкәндин кейин, қәшқәрниң ғайәт зор тәрәққиятларға еришкәнлики вә филимдә қәшқәрниң йеңи қияпитини көргән хитайларниң "биз төлигән бәдәллиримизниң бикарға кәтмигәнликини көрүп хурсән болдуқ," дегәнлики баян қилинған.

Һалбуки уйғур көзәткүчиләр "бу филим хитайниң уйғур елидики ишғал тарихини йорутуп бериду," дәп қаримақта.

Мәлум болушичә, "қәшқәр гүли" дәп нам берилгән бу филим келәр йилиниң бешида қоюлидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт