Вилсон мәркизи пакистанниң 1955 - йили қәшқәрдә консулхана қурушни тәләп қилғанлиқи һәққидики мәхпий һөҗҗәтни елан қилған

Мухбиримиз қутлан
2016-10-29
Елхәт
Пикир
Share
Принт


Баш шитаби вашингтондики вилсон тәтқиқат мәркизи 1955 - йили хитай билән пакистанниң икки тәрәпниң чегра шәһәрлиридә консулхана қуруш һәққидә тартишма елип барғанлиқи һәққидики мәхпий һөҗҗәтләрни йеқинда ашкара қилған.

Мәлум болушичә, хитай компартийәси 1949 - йили һакимийәт бешиға кәлгәндин кейин наһайити тезла пакистан билән достлуқ мунасивити орнатқан. Хитай тәрәп карачида баш әлчихана қурғандин кейин 1955 - йилиниң бешида шәрқий пакистанда консулхана ечишни тәләп қилған. Буниңға җавабән пакистан тәрәпму уйғур елиниң җәнубидики муһим шәһәр қәшқәрдә консулхана ечиш тәлипини оттуриға қойған.

Вилсон мәркизи елан қилған һөҗҗәткә қариғанда, хитай ташқий ишлар министерлиқи 1955 - йили 8 - өктәбир күни пакистанниң тәлипигә бинаән уйғур аптоном районлуқ партком вә хәлқ һөкүмитигә алақә әвәтип, пакистанниң қәшқәрдә консулхана ечишиға қандақ пикирдә икәнликини сориған.

Уйғур аптоном районлуқ партком билән хәлқ һөкүмити шу йили 29 - өктәбир күни бейҗиңдики хитай ташқий ишлар министерлиқиға җаваб йезип мундақ дегән: «шинҗаң чегра район. Бу йәрдики аз санлиқ милләтләр вә уларниң диний етиқади интайин сәзгүр вә мурәккәп. Шуңа биз шинҗаңниң бихәтәрликини көздә тутуп мундақ қаридуқ. Әгәрдә пакистан қәшқәрдә консулхана ачса җасуслуқ билән шоғулланмайду дегили болмайду. Униң үстигә, қәшқәрдә чәтәл консулханисиниң болуши бу йәрдики милләтләрниң инақ - иттипақлиқиға зиян кәлтүриду шундақла бизниң хизмәтлиримизгиму аваричилиқ туғдуриду.»

Буниңдин көривелишқа болидуки, хитай һөкүмити 1949 - йилидин кейин совет иттипақидин башқа һәрқандақ бир дөләтниң уйғур елида консулхана ечишиға йол қоймиған. Һәтта өзиниң әң садиқ қошниси пакистанниң қәшқәрдә консулхана ечиш тәлипиниму рәт қилған.

Пикирләр (0)
Share
Толуқ бәт