Хитай қораллиқ қисимлири қәшқәрдә йәнә һәйвә көрсәткән

Мухбиримиз җүмә
2017-04-01
Елхәт
Пикир
Share
Принт


Хитай қораллиқ қисимлири 31-март қәшқәрниң хәлқ мәйданида параттин өтүп һәйвә көрсәткән. Хитай ахбаратлирида көрситишичә, мәзкур һәрикәткә «һәйвә қилип чөчүтүш, қораллиқ күч көрситиш һәрикити» дәп нам берилгән. Бу даириләрниң йеқини 45 күн ичидә қәшқәрдә 3-қетим шу хилдики һәйвә көрситиш һәрикити елип бериши.

«Тәңритағ тори» ниң хәвәр қилишичә, бу нөвәттики күч көрситиш һәрикити илгиридики һәрикәтләргә охшимайдикән. Бу һәрикәткә қатнаштурулған әскәр вә муқимлиқ сақлаш аптомобиллириниң сани көп болғандин сирт, улар қәшқәр вилайәтлик партком алдидин 3 йолға бөлүнүп шәһәр мәркизигә қарап йүрүш қилған һәмдә қәшқәр май киноханиси доқмуши қатарлиқ мәркизий йолларда айлинип шоар товлиған.

Әмма, хәвәрдә һәйвә көрситиш һәрикитигә қатнаштурулған әскәр вә аптомобилларниң сани һәққидә учур берилмигән.

Хитай даирилири уйғур аптоном райониниң террорлуққа қариши туруш чоң йиғинини17-феврал қәшқәрдә ачқан вә қәшқәр хәлқ мәйданиға бир нәччә миң әтрапидики қораллиқ сақчи қисми, сақчи, хәлқ әскәрлири вә от өчүрүш қисимлирини йиғқан. Йиғинда уйғур аптоном районниң муавин партком секретари җу хәйлун сөз қилип, аталмиш «учи хил күчләргә үзүл-кесил зәрбә бериш» ни тәкитлигән иди.

Униңдин башқа хитай даирилири 28-феврал үрүмчидә 10 миң кишилик һәрбий парат уюштурған вә параттин кейинла қораллиқ сақчи қисимлирини қәшқәр вә хотән қатарлиқ вилайәтләргә йоллиған.

Шу күни йолучилар айропилани билән қәшқәргә йетип кәлгән хитай қораллиқ сақчи қисимлири қәшқәр хәлқ мәйданиға топлинип қәсәмяд мурасими өткүзгән иди.

Ройтерсниң алдинқи күни хәвәр қилишичә, хитай даирилири қәшқәрдә қатмуқат бихәтәрлик тәдбирлири алған болуп, һәтта йәрлик дукандарларму күндә бир нәччә қетим челинидиған террорлуққа қарши агаһландуруш сигналиға әгишишкә мәҗбур икән. Улар теровога челинған һаман қоллириға калтәк-тоқмақлирини елишип кочиға чиқишидикән вә мәвһум пичақлиқ һуҗумчиға тақабил туруш маневири елип баридикән.

Йәрликтин радиомизниң игилишичә, бу хилдики бимәнә тәдбирләр чен чүәнго уйғур елигә йөткәлгәндин буян техиму көпәйгән, һәтта деһқанларму бир қисим кәнт ишханилирини сақлашқа орунлаштурулған.

Нөвәттә уйғур елидә һәссиләп көпәйтилгән вә қатму-қат күчәйтилгән бихәтәрлик тәдбирлири һәққидә ғәрб мәтбуатлирида берилгән хәвәрдә хитайниң уйғур елини бир сақчи дөлитигә айландуруп қоюватқанлиқини көрситилгән иди.

Пикирләр (0)
Share
Толуқ бәт