Қәшқәр конашәһәрдики вирус юқуми давамлиқ өрлимәктә

Қәшқәр конашәһәр наһийәсидә байқалған таҗсиман вируси юқуми давамлиқ көпәймәктә. 5-Ноябир күни хитайниң шинхуа агентлиқи тарқатқан хәвиридә уйғур елида 4-ноябир саәт 0:00 дин 24:00 гичә йеңидин диягноз қоюлған юқумланғучини 8 нәпәр, кесәллик аламити болмиған юқумланғучи 2 нәпәр, уларниң һәммиси конашәһәр наһийәсидә дәп елан қилди.

Хәвәрдә илгири сүрүлүшичә, һазир омумий ениқ диягноз қоюлған вирус юқумдари 72 нәпәр, аламәтсиз юқумдарлар 339 нәпәр болған. Аламәтсиз юқумдарларниң 324 нәпири қәшқәр вилайитидин, 15 нәпири қизилсу областида икән.

Хитай һөкүмитиниң вирус юқуми һәққидә һәқиқий санни йошуруши түпәйлидин вирус юқуминиң кеңийиватқанлиқи мәлум болсиму, әмма униң һәқиқий көлими йәнила муҗимәл турмақта.

Хитайниң “тәңритағ хәвәрләр тори” ниң хәвиридин қариғанда, 1-январ күни қәшқәрдә юқумниң алдини елиш-тизгинләш хизмитини йәниму күчәйтиш тоғрисида бир мәхсус йиғин чақирилған болуп бу йиғинға уйғур аптоном райониниң партком секритари чен чүәнго, хитай дөләтлик сәһийә-сағламлиқ комитетиниң муавин мудири йү шөҗүнлар қатнишип, юқумни қәтий контрол қилишни тәкитлигән. Улар: “юқумниң тарқилиш йоллирини қәтий үзүп ташлаш керәк; дохтурхана ичидә гирәләшмә юқумлиниш йүз беришини қәтий тосуш керәк; нуқтилиқ сорун вә нуқтилиқ кишиләр топида дәл җайида алдини елишни күчәйтиш керәк,” дегәнләрни тәкитлигән.

Көзәткүчиләр уйғур елидики юқум әһвалиниң елан қилинғандин көп юқирилиқини тәхмин қилмақта.