Xitay tashqi ishlar ministiri chin gang muxbirlargha amérikani tehdit dep körsetken

3-Ayning 7-küni, xitay xelq qurultiyi 14-nöwetlik wekiller yighini dawamlishiwatqanda ötküzülgen axbarat élan qilish yighinida, xitay tashqi ishlar ministiri chin gang amérikani “Xitayning igilik hoquqi we tereqqiyatigha tehdit séliwatqan dölet” dep eyibligen.

Amérika “Siyasetchi” tori 9-mart küni élan qilghan xewerde bildürülüshiche, chin gang bu axbarat élan qilish yighinida amérikani “Xitayning igilik hoquqigha tajawuz qiliwatqan dölet” dégen. Emeliyette bu xil qattiq pozitsiyeni shi jinping bashlap bergen bolup, xitay wekillirige qilghan sözide “Amérika bashchiliqidiki gherb döletliri bizni sirtmaqqa élip, tereqqiyatimizgha tosqun boluwatidu” dégen, ötken yil 11-ayda hindunéziyede prézidént jow baydén bilen körüshkende hasil qilghan “Muqim, saghlam diplomatiyege tayinish” tin waz kéchip, “Chil böre diplomatiyesi” ge qaytiwatqanliqini körsetken.

Amérika xitayning jasusluq hawa sharini étip chüshürgendin kéyin, ikki döletning munasiwitide yaxshilinish emes, sürkilish kücheygen bolup, xitay amérika we yawropa döletlirige qarshi meydan'gha ötüp, rusiye bilen téximu küchlük ittipaq qurghan, hetta rusiyege qoral yardem qilmaqchi bolghanidi.

“Siyasetchi” toridiki xewerge qarighanda, amérika dölet xewpsizliki komitéti bayanatchisi jon kérbiy (John Kirby) chin gangning geplirige inkas bildürüp: “Xitay tashqi ishlar ministirining ikki dölet munasiwitidiki meydani qilche özgermigen” dégen.

Amérika awam palatasi xitay ishliri alahide komitétining re'isi mayk galigér (Mike Gallagher) chin gangning qutratquluq tüsini alghan bayanlirigha qarshi inkas bildürüp: “Uning gepliri shuni körsitiduki, xitay kompartiyesining ‛yuqumni nölge chüshürüsh‚ siyasitidin kéyin yéngi burulush hasil qilghanliqi yalghan. Ularning bizni qarilap, bashqilarni aldashtiki séhir küchi qisqa waqit körünidighan ézitqu serrapqa oxshaydu” dégen.