Uyghur teshkilatliri: “Qirghinchiliqqa qarshi yéngi jaza tedbirlirini qollinish lazim!”

Uyghur diyarida “Terbiyelesh merkizi” namida sistémilashqan lagérlarning heqiqi qiyapiti “Shinjang saqchi höjjetliri” namidiki bir yürüsh mexpiy höjjetlerde ashkara bolghandin kéyin, xitay hökümitining bu “Mektep” lerni inkar qilishi hemde birleshken döletler teshkilati (b d t) kishilik hoquq aliy kéngishining re'isi mishél bachélétning bularni “Körmey qalghanliqi” xelq'arada chong ghulghula qozghighan idi. Mana mushu xil arqa körünüsh astida yéqinda bir qisim Uyghur teshkilatliri birleshme mektup yollap: “Yer shari magnétiski qanuni” ni Uyghur diyaridiki qirghinchiliqqa ishtirak qilghan barliq emeldarlargha tedbiqlashni telep qilghan.

“Zémistan” zhurnilining 9-awghusttiki bash maqaliside körsitilishiche, dunya Uyghur qurultiyi, komunizim qurbanliri xatire fondi, Uyghur herkiti teshkilati, Uyghur kishilik hoquq qurulushi qatarliqlar amérika maliye ministiri jénit yéllén (Janet Yellen) we amérika tashqiy ishlar ministiri antoni bilinkén (Antony Blinken) gha birleshme mektup yollighan hemde Uyghur diyaridiki qirghinchiliqqa jawabkar emeldarlar qatarigha jaw kéji (xitayning sabiq j x minsitiri), wang yang, go shéngkun (merkiziy siyasiy-qanun komitétining sékrétari), xu lyenxé qatarliq kishilernimu qoshushning lazimliqini tekitligen. Shuningdek bundaq qilishning Uyghurlar heqqidiki qanun layihesigimu uyghun ikenlikini eskertken.

Uyghur kishilik hoquq qurulushi teshkilatining diréktori, mezkur birleshme mektubqa imza qoyghuchilarning biri bolghan Uyghur pa'aliyetchilerdin ömer qanat bu heqte söz qilip: “Néme üchün xitay kompartiyesining emeldarliri hélihem bexüdük kaliforniyede, wankuwérda we fransiyede öy sétiwalalaydu? démek, bizning hazir ‛yer shari magnétiski qanuni‚ ni ijra qilip ashu emeldarlarning chet ellerdiki bayliqini tonglitip qoyushimizning waqti keldi,” dégen.

Nöwette Uyghur diyaridiki qirghinchiliqni cheklesh heqqide türlük chaqiriqlar otturigha qoyuluwatqan bolup, yawropadiki bir qisim döletlermu bu sepke qoshulushni oylashmaqta iken.