Qirghizistanning yéngi saylan'ghan prézidénti jüme küni qesem bérip wezipe tapshuruwaldi

Muxbirimiz erkin
2017-11-24
Élxet
Pikir
Share
Print

Qirghizistanning yéngi saylan'ghan prézidénti suronbay jénbékof jüme küni qesem bérip, prézidéntliq wezipisini tapshuruwaldi. Bu, nopusi 6 milyonluq qirghizistanda saylam arqiliq wezipige olturghan rehberlerning tunji qétim hoquqni öz ara bir birige tinchliq bilen ötküzüp bérishidur. Bu yil 59 yashqa kirgen suronbay jénbékof qesem bérish murasimida qirghizistanning "Birlikini qoghdashqa" wede bergen.

Qirghizistanning burunqi ikki prézidénti 2005 -we 2010‏-yilliridiki isyanda aghdurulghan. 2‏-Qétimliq isyandin kéyin partlighan özbékler bilen qirghizlar otturisidiki toqunushta nurghun adem ölgen idi. Jénbékof, rus we qirghiz tillirida qilghan qesem bérish murasimidiki sözide qirghizlarning milliy dastani - "Manas" tin üzündilerni neqil keltürüp, xiyanetchilikke qarshi küresh qilidighanliqini bildürgen. U, "Xiyanetchilikke qarshi shepqetsiz küresh bashlandi. Jem'iyetni tazilashning shert-shara'iti piship yitildi," dégen.

Qirghizistan asasi qanunida prézidéntning wezipe ötesh mudditi 6 yil bilen cheklinidu. Burunqi prézidént atambayéf dewride qirghizistan nispiy tinchliqqa érishken bolsimu, emma heqiqiy islahat élip baralmighan.

Firansiye agéntliqining jüme küni bergen xewiride qeyt qilishiche, atambayéf özning xizmitini mu'eyyenleshtürüp, "Biz hazir yenila musteqil dölet bolup turuwatimiz," dégen. Biraq chet'ellik bezi analizchilar jénbékofning islahat élip bérishi, xiyanetchilikke qarshi küreshni qanchilik dawamlashturushi gumanliq, dep qarimaqta.

Jénbékof bu yil 15‏-öktebir ötküzülgen saylamda 54 pirsent awazgha, uning reqibi ömürbék babanof 35 pirsenttin artuq awazgha érishken. Firansiye agéntliqining bayan qilishiche, prézidént jénbékof atambayéfning rusiyege mahil siyasitini dawamlashtursimu, biraq u qazaqistan bilen bolghan munasiwetni qandaq tüzesh mesilisige duch kélidiken. Bu qétimqi saylamda qazaqistan prézidénti nezerbayéf jénbékofning riqabetchisi ömürbékni qollighan idi.

Toluq bet