Qirghizistan pochtisining qeshqerde wakalet ishxanisi échishi diqqet qozghidi

“Yawro-asiya xewerliri” (Eurasia Net) torining xewer qilishiche, qirghizistan reqemlik tereqqiyat ministirliqi 23-awghust küni qirghizistan pochta idarisining qeshqerde wakalet ishxanisi achidighanliqini élan qilghan.

Qisqiche bayanatta körsitilishiche, bu wakalet ishxanisi xitay pochta idarisi qeshqer alahide iqtisadiy rayonidiki “Xelq'ara pochta almashturush merkizi” ning bashqurushida ishleydiken. Qirghiz da'iriliri bayanatida, qirghizistanliq pochta mulazimet wekillirining qandaq xizmet qilidighanliqi toghrisida éniq melumat bermigen biraq bu ishxanining “Pochta ul esliheliri” ni yaxshilap, ikki dölet sodisini tereqqiy qilduridighanliqini ilgiri sürgen.

Bayanatta mundaq déyilgen: “Bu wakalet ishxanisi chégra halqighan tor sodisigha qulayliq yaritishta alahide rol oynaydu hemde sodigerler bilen istémalchilarning öz'ara herikitige yéngi purset yaritip béridu” .

Mezkur xewerde éytilishiche, xitay bilen qirghizistan arisidiki tor sodisida 2020-yildin bashlap azraq artish körülgen bolsimu, nisbeten yenila töwen iken. Bundin bashqa yene, qirghizistan da'iriliri tor sodisini kücheytish üchün, xitayning alibaba shirkitining tor sodisi supisidiki kölimini kéngeytish heqqide ular bilen kélishim imzalighan. Emma xitaydiki iqtisadiy chékinish, ishsizliq we istémalning töwenlishini nezerde tutqanda, tor sodisining unche téz éship kétishi éhtimaldin uzaqken. Yene bir jehettin, ularning hazirqi tor sodisi miqdarining yene bir mezgil töwen halette turush éhtimalliqini nezerde tutqanda, qirghizistan pochtisining qeshqerde wakalet ishxanisi échishi so'al peyda qilghan.

Éhtiyaj bolmighan ehwalda, bu wakalet ishxanisining échilishidiki seweb néme?

Bu xewerning aptori jastin burk (Justin Burke) ning déyishiche, qirghizistanning wakalet ishxanisining qeshqerde bolushi uning qoshumche wezipiliri heqqide yip uchi bilen teminlishi mumkinken. Jümlidin, qeshqerning qizilsu qirghiz aptonom oblastining yénigha jaylashqanliqi, uning üstige qeshqerning xitayning Uyghur qatarliq musulman milletlerge zerbe bérishtiki merkizi bolup kelgenlikini nezerde tutqanda, qirghiz pochtisining u yerde ishxana échishi yalghuz tor sodisi üchünla emes, belki xitay da'irilirining chégraning ikki teripidiki qirghizlar arisidiki xet we alaqini kontrol qilish meqsitige xizmet qilish üchün échilghan bolushi mumkin iken.

Melum bolushiche, qeshqerde qirghizistan pochtisi wakalet ishxanisini échish toghrisidiki bu xewer 8-ayning otturilirida qirghizistan bash ministiri aqilbék japparofning Uyghur élige qilghan ziyaritidin kéyinla élan qilin'ghan. Bundin burun, 6-ayda, qirghizistan ichki ishlar ministirliqi wekiller ömiki Uyghur élini ziyaret qilghanda, xitay terep bilen bixeterlik hemkarliqini kücheytish toghrisida bir qatar kélishimlerni imzalighan bolup, qirghiz ichki ishlar ministirliqi eyni chaghdiki bayanatida, “Qirghizistan bixeterlik xadimliri shinjangdiki ziyariti mezgilide xitay saqchi da'irilirining reqemleshtürüshtiki yéngi muweppeqiyetlirini tetqiq qilish pursitige érishti” dégen iken.