Qirghizistanning narin rayonida xitaygha qarshi namayish yüz bergen

Muxbirimiz irade
2020-02-18
Share

Qirghizistanning atbéshi yézisigha yéqin jayda xitayning qurulush pilanlirigha qarshi namayish yüz bergen. Bu yéqindin buyan qirghizistanda xitayning zoriyiwatqan tesirige qarshi qozghalghan yene bir kölimi bir qeder zor weqe bolup hésablinidiken.

Azadliq radiyosining qirghizistandin bergen xewiridin qarighanda, 17-féwral küni nechche yüzligen kishi qirghizistanning narin rayonidiki atbéshi yézisigha yéqin jayda namayish qilip, hökümettin xitayning rayondiki qurulush pilanini emeldin qaldurushni telep qilghan. Melum bolushiche, xitaygha tewe bolghan bu qurulush pilani 275 milyon dollar qimmitidiki bir tayanch bazisi türi bolup, bu qurulush 2019-yili xitay dölet re'isi shi jinping qirghizistanni ziyaret qilghan mezgilde maqullan'ghaniken.

Namayishchilar shu küni qollirida "Biz bu tayanch bazilirining qurulushigha qarshi turimiz", "Qirghiz zémini xitaygha bérilmisun" dégendek sho'arlar yézilghan lozunkilarni kötürgen.

Azadliq radiyosining xewer qilishiche, namayish teshkilligüchiliri düshenbe künidiki namayishqa 2000 etrapida kishi qatnashqanliqini ilgiri sürse, hökümetning rayondiki wekili emilbek alimquluf namayishchi sanini 700-800 etrapidiliqini ilgiri sürgen. U sözide namayishchilarning telipige hökümetning yéqinda bir jawab qayturidighanliqini bildürgen.

Qirghizistanning narin rayonida ilgirimu mushundaq bir naraziliq herikiti yüz bergenidi. 2019-Yili 8-ayda yüz bergen bu weqede, 500 etrapida yerlik xelq shu jaydiki altun kénini échiwatqan "Jongji" namliq xitay shirkitining kan rayonigha basturup kirip, xitay ishchilar bilen toqunushqan we shirketning bir qanche kranlirini musadire qilghan. Qirghiz ahalisi bu kanlarning muhitni bulghighanliqini bildürgen. Shu qétimliq toqunushta 20 din oshuq xitay ishchining yarilan'ghanliqi xewer qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet