Xitayning qirghizistandiki elchixanisi qirghizlarni lagérgha solighanliqini yoshurushqa urun'ghan

Xitayning béshkektiki elchixanisi Uyghur rayonidiki qirghizlarni lagérgha solighanliqini we ularni qiynighanliqini yoshurushqa urun'ghan.

“Zémistan” torining xewer bérishiche, qirghizistan'gha qéchip barghan bir lagér shahiti qirghizlarning lagérgha solinish ehwalini ashkarilighan. Uning bildürüshiche, az dégende 10 ming qirghiz aqtu nahiyesidiki atalmish “Qayta terbiyelesh merkizi” namidiki lagérgha solan'ghan؛ yene bir qisimi atush, ulughchat we aqchi nahiyesidiki lagérlargha solan'ghan bolup, hemmini qoshqanda, 25 mingdin ashidiken.

“Aygul” isimlik bu qirghiz shahit eslide qirghizistan'gha oqushqa chiqqan bolup, 2017-yilgha kelgende xitay elchixanisi uni we sawaqdashlirini aptobusqa sélip, torghat éghizigha élip barghan؛ chégradin ötken haman xitay saqchiliri ularning béshigha qara xalta kiygüzüp, qollirigha koyza salghan. Qirghiz qizlar lagérda qaq seher turup “Partiye nizamnamisi” ögen'gen, “Dölet naxshisi” éytqan, pishurulghan ot-chöp yégen, meynet su ichken, saqchilardin tayaq yégen, ular qirghizistanda yaki qazaqistanda oqughanliqi üchünla shundaq jazalan'ghan.

Aygul qoyup bérilgendin kéyin, qirghizistan'gha chiqiwalghan we lagérdiki qabahetni dunyagha ashkarilighan birdinbir qirghiz shahit bolup qalghan. Xitayning béshkekte turushluq elchixanisi buningdin narazi bolup, aygulning hékayisini yalghan'gha chiqarghan hemde qirghizistan hökümiti we taratqulirigha bésim ishlitip, lagér qurbanlirining hékayilirini anglatmasliqni telep qilghan.

Yene bir qirghiz lagér shahiti owalbek turdaxun kommunizm qurbanliri xatire fondining yardimi bilen 2022-yil amérikagha kélip öz kechmishlirini anglatqanidi.