Qirghizistanliqlarning xitay wizisi élishi qiyinlashqan

Muxbirimiz ümidwar
2017-04-30
Élxet
Pikir
Share
Print

Perghane uchur torining xewer qilishiche, yéqindin buyan xitayning qirghizistandiki konsulxanisi qirghizistan puqralirigha wiza bérishni toxtitip qoyghan. Buning bilen xitay bilen soda qilidighan shirket xadimliri yaki shexsiy tijaret qilidighanlargha qiyinchiliq kélip chiqqan.

Xitay terep özining néme üchün wiza bérishni toxtatqanliqini chüshendürmigen bolup, netijide tijaretchiler we yük aptomobil shopurliri özlirige kéreklik mallarni élip kélish üchün xitay terepke baralmighanliqidin narazi bolushqan, emma xitay terep yük aptomobilliri we xitay sodigerliri yenila erkin halda qirghizistan'gha kelmekte iken.

Xewerde körsitilishiche, bu yil yanwardin bashlap xitayning qirghizistandiki elchixanisining konsul bölümi wiza béjirish höjjetlirini ilgirikidin murekkepleshtürgen bolup, ular wizagha iltimas qilghuchining barmaq izini telep qilishni bashlighan.

Ötken yili 30-awghust küni bishkektiki xitay elchixanisi hujumgha uchrighandin kéyin, xitay terep bir mezgil wiza bérishni toxtitip qoyghan bolsimu, emma ariliqta yene eslige keltürgen iken. Azadliq radi'osining xewiride yézilishiche emma wiza élish qiyinlashqan, hetta sayahet wizisi toxtitilghan iken.

Melumki, xitay bilen qirghizistan arisidiki soda-iqtisadiy alaqiler izchil aktip halda bolup, nurghunlighan qirghizistanliqlar xitay wizisigha ériship, qoshna Uyghur diyari we ichki xitay chong sheherliridin her xil mehsulatlarni kirgüzüp, soda qilidu,shuningdek yene köp sandiki xitay puqralirimu qirghizistanda soda ishliri bilen shughullinip kelmekte idi.

Toluq bet