Уйғур аптоном районидики оттура, башланғуч мәктәпләрдә “қош тиллиқ маарип” ниң қаплаш нисбити 70% кә йәткән

Мухбиримиз қутлан
2016.06.20

Уйғур аптоном районлуқ маарип назарити бүгүн райондики “қош тиллиқ маарип” һәққидә баянат елан қилип, аталмиш “қош тиллиқ маарип” тәрбийәси еливатқан оқуғучиларниң 2 милйондин ашқанлиқини, йәслиләрдики “қош тиллиқ тәрбийә” ниң омумлишиш нисбитиниң 90% кә йеқинлашқанлиқини, башланғуч, оттура мәктәпләрдә “қош тиллиқ маарип” ниң қаплаш нисбитиниң 70% кә йәткәнликини елан қилған.

Тәңритағ ториниң хәвиригә қариғанда, хитай мәркизий һөкүмити 2010-йилидики “шинҗаң хизмити йиғини” да “қош тиллиқ маарип” ни дөләт истратегийәси дәриҗисигә көтүргән һәмдә “қош тиллиқ маарип” ни уйғур елиниң җәнубидики 3 вилайәт, бир областқа шиддәт билән омумлаштурған.

Мәлум болушичә, 2015-йилиға кәлгәндә, уйғур аптоном районидики башланғуч, оттура мәктәпләрдә “қош тиллиқ маарип” тәрбийәси еливатқанлар вә хитай синиплирида арилишип оқуватқанлар 2 милйон 240 миңдин ешип, йәрлик милләт оқуғучилириниң 77% ни тәшкил қилған.

Уйғур аптоном районлуқ маарип назарити мәзкур баянатта йәнә буниңдин кейинки маарип хизмитиниң асаслиқ мелодийәсиниң давамлиқ “қош тиллиқ маарип” болидиғанлиқини, һәр дәриҗилик һөкүмәтләрниң “қош тиллиқ маарип” саһәсигә пүтүн күчи билән мәбләғ салидиғанлиқини билдүргән.

Көзәткүчиләр, хитай һөкүмитиниң йеқинқи 10 йил мабәйнидә намда “қош тиллиқ маарип” дейиливатқан, әмәлийәттә хитай тилини асас қилған “йәккә тиллиқ маарип” ниң уйғур елида тарихтин буян давамлишип кәлгән уйғур тилидики миллий маарипни пәйдин-пәй сиқип чиқириватқанлиқидин қаттиқ әндишиләнмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.