Уйғур район даирилири “қош тиллиқ йәслиләр” ни көпәйтишни қарар қилди

Мухбиримиз үмидвар
2016-11-30
Share

Уйғур аптоном районлуқ маарип назарити даирилири уйғур дияридики уйғур қатарлиқ хитай болмиған милләт балилирини йәслидин башлап хитай тилида тәрбийиләшни мәқсәт қилған қош тиллиқ йәслиләрни кеңәйтиш вә техиму көпәйтишни қарар қилған.

28-Ноябир күни маарип назарити вә һөкүмәт бирлишип ачқан йиғинда, уйғур дияриниң йеза, кәнтлиридики, болупму нуқтилиқ һалда җәнубтики қәшқәр, ақсу, хотән, қизилсу қатарлиқ вилайәт вә областлардики үч йиллиқ һәқсиз қош тиллиқ йәсли маарипини техиму омумлаштуруш тәкитлиниш билән бир вақитта йәнә, 2017-йили пүтүн райондики қош тиллиқ йәслиләрниң санини 4387 гә, уйғур дияриниң җәнубидики қош тиллиқ йәслиләрни 3223 кә йәткүзүш қарар қилинған.

Шундақ болғанда, ақсу, қәшқәр, хотән, қизилсу қатарлиқ районлардики қош тиллиқ йәслиләр пүтүн уйғур дияридики қош тиллиқ йәслиләр нисбитиниң 74% ни игиләйдикән.

Даириләр йәнә, 2017-йили пүтүн уйғур дияри бойичә қош тиллиқ йәслиләргә бир милйон 120миңдин артуқ балини қобул қилиш, буниң ичидә 770 миңға йеқин балиниң уйғур дияриниң җәнубидики үч вилайәт вә бир областтики йеза, кәнтләрдин болуши керәкликини бәлгилигән.

Мәлумки, җәнубий вилайәтләрдики йеза, қишлақ аһалисиниң мутләқ көп қисмини уйғурлар тәшкил қилиду.

Дуня уйғур қурултийиниң баянатлирида көрситилишичә, хитай күчәйтип йүргүзүватқан қош тиллиқ маарип, йәни қош тиллиқ йәсли маарипи әмәлийәттә пәқәт йәккә тиллиқ, йәни хитай тиллиқ маариптин ибарәт болуп, бу, уйғур диярида тарихтин буян давамлишип келиватқан уйғур тили маарипини чәкләп, уйғур пәрзәнтлирини кичик вақтидин тартип хитай тилида вә хитай мәдәнийитидә тәрбийиләп, уларни өз миллий тил, йезиқи вә мәдәнийитидин йирақлаштурушни мәқсәт қилиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт